Хорвоогийн гурван их буяны нэг нь хүүхэд төрүүлж өсгөх, хоёр дахь нь ном бүтээх, гурав дахь нь байгаль дэлхийгээ хайрлаж мод тарих явдал билээ. Гэтэл зовж зовж төрүүлсэн үрээ хэн нэгний буруугаас  эсвэл өөрсдийн хайхрамжгүйгээс болоод  алдана гэдэг үнэхээр харамсалтай.

Манай улсын нийт хүн амын 36 хувь буюу гуравны нэгээс илүү хувийг  18 хүртэлх насны хүүхэд эзэлдэг. Гэтэл сүүлийн саруудад л гэхэд бүр цаашлаад он гарсаар амиа алдсан хүүхдийн тоо эрс өссөнийг  та бүхэн мэдэж байгаа байх.

“Бага насны охид, хөвгүүд газ үнэрлэж байна” , “Зам тээврийн осолд орлоо”,  “Барилга дээрээс төмөр унаж хүүхэд амь насаараа хохирлоо”,  “Хүүхэд хүчиндүүлж байна”, хүүхэд түлэгдэж нас барлаа. Тиймээ иймэрхүү мэдээлэл хаа сайгүй гарах болсон. Бүр ойр ойрхон шүү.  “Эхэндээ бид энэ мэдээллүүдээс айж цочирддог байсан бол сүүлдээ тоохоо  ч больчихож. Өдөр болгон болоод гарч байдаг жирийн үзэгдэл шиг боддог болсон ч байж болох.

Хамгийн гол нь хүүхэд гадны  нөлөөллөөс болж эндэх нь их байгаа ч сүүлийн үед эцэг эхийн хайхрамжгүй байдлаас улбаалан  гэр ахуйн нөхцөлд, найз нөхдийн хүрээнд  эндэж бэртэх нь их болжээ.   Хүүхдийн эндлийн үй олон шалтгаан байгаа. Бага насны хүүхдээ гэртээ үлдээх, хараа хяналтгүй орхисноос амийг нь хохироосон, газ үнэрлэсэн, халуун цай хоолонд түлэгдсэн гэх хэргүүд сүүлийн үед дэндүү гэмээр олон гарсан ч зүрх зүсэм муу мэдээг нэгбүрчлэн тоочихоо азная. Зөвхөн хамгийн сүүлд гарсан аймшигт түймрийг л жишээ болгон дурдъя. Гэмтэл согог судлалын үндэсний төвийн харьяа эмнэлэг болох Түлэнхийн төвд хэвтэн эмчлүүлэгчдийн 80 хувь нь бага насны хүүхдүүд байдаг. Ажилдаа гарахдаа хүүхдийнхээ томоор багыг нь харуулах, өндөр настай эмээ, өвөөтэй нь орхих зэрэг нь Монголд л дэлгэрсэн хэвийн үзэгдэл. Ингэж толгой мэдэн үлдсэн хүүхдүүд халуун цай, хоолондоо түлэгдэх, унаж осолдох нь их.

0-5 насны хүүхдийн түлэгдэлтийн тоо жил ирэх тусам нэмэгдэж, эмнэлгүүдийн ачаалал ихсэх хандлагатай байгаа талаар Сүхбаатар дүүргийн нэгдсэн эмнэлгийн гэмтлийн эмч Ц.Хосбаяр ярилаа. Тэрээр “Ялангуяа хүйтний улиралд ахуйн хэрэглээнээс болж түлэгдэж ирэх тохиолдол их. Тэр тусмаа 0-5 насны хүүхдүүдэд эцэг, эх нь анхаарал хандуулаагүйгээс болж халуун цай, хоол, зууханд бүтэн биеийн түлэгдэлттэй ирэх нь элбэг байдаг. Манай улс түлэгдэлтээрээ тэр дундаа бага насны хүүхдүүд түлэгдэж амь эрсдэх явдал дэлхийн бусад орныхтой харьцуулбал дэлхийд дээгүүрт жагсдаг. Манайхан түлэгдсэн даруйдаа анхны тусламж буруу үзүүлдэг нь түлэнхийн шархыг бохирдуулах хоёрдогч хүндрэл үүсгэдэг. Элсэн чихэр, барааны саван, янз бүрийн тос,  гутлын тос, шороо ч түрхсэн байдаг. Гутлын тос чинь органик хортой бодис шүү дээ. Арьс шархалсан байхад дээр нь түрхээд цусанд бохир оруулдаг аюултай. Түлэгдсэн тохиолдолд гол авах анхан шатны арга хэмжээ нь крантны хүйтэн ус хэрэглэх, дараа нь марль цэвэрхэн хөвөнгөөр ороож эмнэлэг дуудах хэрэгтэй” гэсэн юм. 2008-2012 онуудад түлэгдэлтэд өртсөн иргэдийн судалгаанаас харахад 0-5 хүртэлх насны хүүхдийн түлэгдэлт 3265 тохиолдол буюу, нийт түлэгдэлтийн 86 хувийг эзэлж байгаа нь анхаарал татаж байгаа юм. Мөн  хүүхдээ түлэгдэх үед эцэг эхчүүдийн 78.1 хувь нь эмнэлэгт очихгүйгээр гэртээ ямар нэгэн арга хэмжээ авдаг байна.

Хамгийн сүүлд л гэхэд, Уржигдар ХУД-ийн 4-р хороонд гэртээ 1 ой зургаан сартай эрэгтэй Э нь тогоотой буцалсан усан дээр унаж түлэгдэн эмчлүүлж байгаад нас барсан байна. Хэргийг ХУД-ийн цагдаагийн хоёрдугаар хэлтэс шалгаж  байна.

Ирээдүйн Монголыг бүтээх бяцхан үрс маань ийм эрсдэлтэй цаг үед өсөж байна. Түлэнхийн төвийн ийм бараан төрх бол Монголын нийгмийн маш том асуудал. Энэ нь ядуурал, хүүхдээ оруулах цэцэрлэг хүрэлцээгүй, ясли байхгүйтэй ч шууд холбогдоно. Бяцхан үрсдээ цаг ямагт анхаарлаа хандуулахаа мартуузай хүмүүс ээ!