Дархан-Уул аймагт өнгөрсөн онд хүүхэд барьцаалсан хэрэг гарч олныг цочирдуулсан. Цагдаагийн Ерөнхий газрын Тусгай тасаг тус аймагт очиж, хэргийг мөрдөж, шуурхай ажиллан хэрэгтнийг цаг алдалгүй барьсан байдаг.

 Болсон хэргийг тодруулбал, барьцаалагч утасны дугаараа нууцлан, дуу хоолойгоо өөрчлөн, найман настай хүүгийн эцэг рүү залгаж, “100 сая төгрөг өгөхгүй бол хүүхдэд чинь муу зүйл тохиолдоно. Цагдаад хэлбэл хүүхдээ харахгүй гэж мэдээрэй. Хотод байдаг охинд чинь ч муу юм болно шүү” гэж сүрдүүлсэн гэдэг.

 Уг хэргийг тус аймгийн “ТВ-12” телевизийн захирал асан Г.Энх-Од үйлдсэн бөгөөд мөрдөн байцаалтын явцад тэрбээр хэргээ хүлээж “Буруу зүйл хийснээ ойлгож байна. Би хүүд муу зүйл хийгээгүй, хоол, цай өгч байсан” хэмээн мэдүүлсэн байдаг.

Улмаар уг хэргийг Чингэлтэй дүүргийн шүүхэд хэлэлцсэн бөгөөд анхан шатны шүүхээс чанга дэглэмтэй хорих ангид гурван жил зургаан сарын хугацаагаар хорих ял эдл үүлэхээр шийдвэрлэсэн юм. Харин Нийслэлийн шүүх шүүгчдэгч Г.Энх-Од, түүний өмгөөлөгчийн гаргасан гомдлыг хэлэлцээд Эрүүгийн хуулийн 112 дугаар зүйлийн тайлбар хэсэгт заасан “Барьцаанд байгаа хүнийг сайн дураараа сулласан этгээдийн үйлдэлд өөр гэмт хэргийн шинжгүй бол түүнийг эрүүгийн хариуцлагаас чөлөөлөх” тухай заалтыг үндэслэн эрүүгийн хариуцлагаас чөлөөлсөн байна. Уг нь нийтэд аюултай ийм үйлдэлд эрүүгийн хариуцлага ногдуулах нь энэ төрлийн гэмт хэрэг үйлдэгчдийг өөгшүүлэхээс сэрэмжлэх үндэслэл болмоор санагдана. Гэвч гэмт этгээдийг суллаж явуулж байгаа нь олны дургүйцлийг хүргэж байна. Тэр тусмаа хүүхдээ барьцаалуулсан эцэг, эх ихэд гомдолтой байгаа аж.