ШӨХТГ-аас Өрсөлдөөний тухай хууль зөрчсөн "Номин" компанийг 1.1 тэрбумаар "Миний сүлжээ" дэлгүүрийг 450 сая төгрөгөөр тус тус торгохоор болсон тухайгаа дөнгөж сая мэдээллээ.

Учир нь эдгээр дэлгүүрүүд бараа бүтээгдэхүүнээ үнийн зөрүүтэй зарж байсан төдийгүй бүтээгдэхүүн нийлүүлдэг компаниуддаа зүй бус шаардлага тавьж илүү төлбөр авдаг гэх зөрчлүүд илэрсэн. Үүний дагуу түрүүчийн удаад ШӨХТГ-аас мэдээлэл хийж байсныг ч та бүхэн санаж байгаа байх. Тус дэлгүүрүүдэд хийсэн шалгалт бараг жил шахуу үргэлжилсэн. Энэхүү супермаркетууд нь янз бүрийн төлбөр, шимтгэл нэрийн дор мөнгө нэмж авдаг. Энэ нь эргээд бараа бүтээгдэхүүний үнийг өсгөдөг гэх зөрчлүүд илэрсэн. Харин үүнийгээ арилга гэсэн шаардлагыг хүргүүлсэн  ч үүнийгээ биелүүлээгүй.

Тэгвэл дээрхи шийдвэрийг танилцуулсаны дараа ШӨХТГ-ын дарга О.Магнайн утсанд 99112780 дугаараас “Чамайг ална шүү” гэж ярьсаар байжээ. Гэтэл  хэдхэн хормын өмнө "Миний дэлгүүр"-ийн захирал Х.Ариунболд хэсэг нөхдийн хамт  ШӨХТГ-ын О.Магнай даргын өрөөрүү дайрч "ална" хэмээн сүрдүүлжээ. Улмаар ШӨХТГ-ын хэлтсийн дарга нар цагдаа дуудсанаар энэ асуудал намжсан талаар О.Магнай дарга хэллээ. Түүнчлэн тэрбээр энэ үйлдлийг зүгээр орхихгүй. Цагдаагийн байгууллагад "Миний дэлгүүр" сүлжээ дэлгүүрийн захирал Х.Ариунболдын эсрэг гомдол гаргана гэдгээ ч хэлэв.

О.Магнай даргын хэлж буйгаар "Эдгээр компаниуд өөрсдийн давамгай байдлаа ашиглаж үнийн хөөрөгдлийг бий болгож байна. Учир нь анх импортоор жүүс оруулж ирж байгаа хүн энэхүү дэлгүүрүүдэд жүүсээ 1625 төгрөгөөр зарна гэсэн хүсэлтээ өгч байгаа. Гэтэл эхний ээлжинд эдгээр дэлгүүрүүд 3.5 хувийг авдаг. Ингэхээр 1680 төгрөг болж байгаа. Тэгсэн атлаа жижиглэнгийн үнэ зохионо гээд 2.9 хувь нэмээд 2070 төгрөг болгочихож байна. Эцсийн үр дүндээ нийтдээ 445 төгрөг нэмэгдээд 27.4 хувиар үнэ өсч байгаа. Үйлдвэрлэгч өөрөө 3-5 хувийн ашгийн төлөө, импортоор оруулж ирсэн хүн 10 хувийн ашгийн төлөө ажиллаж байхад энэ нөхөд давамгай байдлаа ашиглаж 30 хувийн ашиг нэмж байна. Эцсийн үр дүндээ иргэд л хохирч байгаа хэрэг" гэв.