23 настай Жамал Эдуард нь сонирхогчийн кино бүтээгч юм. Лондон хотын баруун хэсэгт амьдардаг энэ хүү хэдэн тэрбум долларын хөрөнгөтэй магнат болон хувирч, алдарт Ричард Брэнсоны найз болсон гэнэ. Жамал бол SBTV хэмээх рэп, поп хөгжим сонирхогчдын видео клипийг ютуб сайтад хийж байршуулдаг компанийн эзэмшигч билээ.
Тэрээр ютуб сайтад байршуулсан видео клипний зар сурталчилгаанаас ашиг олдог байна. Жамал хүүг 15 настай байхад шинэ жилийн баяраар эцэг, эх нь видео камер бэлэглэжээ. Тэр хэзээ ч мэргэжлийн фото студи юмуу сургуульд сураагүй бөгөөд зөвхөн өөрийн хүсэл сонирхолдоо хөтлөгдөн видео клип хийн, зураг авдаг болсон гэдэг. Жамал Эдуард “Би видео клипнүүдээ олон хүнд үзүүлэхийн тулд их хичээл зүтгэл гаргадаг” хэмээн ярьжээ. Мөн тэрээр өөрийн чаддаг зүйлээ олоод, түүнийгээ хөгжүүлэхийг үе тэнгийнхэндээ уриалж байна. Эхлээд 15 настай байхдаа зураг авч байснаа сүүлдээ өөрөө рэппер болж, бичлэгүүдээ ютуб сайтад байршуулж эхэлжээ. Гэхдээ ютуб болон хайлтын хамгийн том систем болох Гүгли компани Жамалд гурван удаа сануулга өгч байсан ч тэрээр зүтгэсээр л байлаа. Эцэст нь Ютуб компани өөрийнхөө хийсэн видео клипүүдийг өөрөө эзэмших эрхтэй гэдгийг хүлээн зөвшөөрсөн юм. Одоо тэрээр 12 ажилтантай SBTV болон вэб сайтыг ажиллуулдаг.
