Хоёр сарын өмнө ОУХТ “Нарантуул” захад гал гарч 300 гаруй түрээслэгч хохироод байгаа билээ. Уг галаас болж түрээслүүлэгч, түрээслэгч хоёр хоёлуулаа их хэмжээний хохирол амсаад байгаа. Одоогоор хохирлыг хэн, хэрхэн барагдуулах нь тодорхойгүй байгаа юм. Түрээслэгч нарын зүгээс хурдан ажлын байртай болохыг хүсч байгаа.

Гал түймрийн шалтгаан нь цахилгааны гэмтлээс болсон гэж гарсан. Одоогоор тэнд худалдаа наймаа эрхэлж байсан иргэдийн хохирлын хэмжээг тогтоох ажил үргэлжилж байгаа юм байна.  Тэгвэл түрээслэгч нар хохирлоо үнэн зөв тодорхойлж, тэр нь холбогдох баримт сэлтээр баталгаажвал бид тодорхой хувийг нь барагдуулахаар ярилцаж байгаа хэмээн тус захын эзэн Ш.Сайхансамбуу хэлж байна.

Мөн тэрбээр Монголд байхгүй худалдааны төвийг байгуулахаар Швейцарийн архитекторчдоор зураг төслийг хийлгэсэн гэнэ. Барилгын ажлыг намраас эхлүүлэх юм байна. Уг шинээр баригдах захыг барихад 80 сая ам.долларын санхүүжилт хэрэгтэй байгаа аж. Нийт зургаан га газрыг хамрах бөгөөд энэ захыг “Нарантуул”-ын өргөтгөлийн хэсэгт барих юм байна. Харин шатсан худалдааны төвийн суурин дээр 16-24 давхар 6000 айлын орон сууц барихаар төлөвлөж байгаа аж. Төслөө хотын захиргаанд танилцуулж зөвшөөрлийг нь авчихсан байгаа юм байна. Тэрбээр тус ажлыг хийхээр бэлтгэлээ хангаж байсан байна.