МИАТ-ийн зарим удирдлагад холбогдох мөнгө угаасан гэх дуулиант хэргийг гурван шатны шүүхээр шийдвэрлээд гаргасан хариу нь олныг гайхшруулаад байна. Анхан болон давж заалдах шатны шүүхээс  мөнгө угаасан болох нь тогтоогдож 10-13 жилийн хорих ял сонсоод байсан МИАТ-ийнхан ,  албан үүрэгтээ хайнга хандсан төдий гэм буруутай  болж үлдээ. Улмаар  Ч.Хоролсүрэнгийн дүү Ч.Суурьтогтохын хэргийг ч г хэрэгсэхгүй болгосон юм.  Ийн МИАТ-ийнханы сүр дуулиантай эхэлж байсан хэрэг эцсийн мөчдөө яагаад ингэж өнгөрөх болов.  Түмний нүдэн дээр шийдэгдсэн  эл хэргийг авлига, мөнгө угаасан хэрэг гэж хууль шүүхийнхэн өөрсдөө харуулсан ч эцэстээ хоорондоо зөрчилдөж албан тушаалдаа хайнга хандсан төдий болгосон нь ямар учиртай юм болоо. Магадгүй Ц.Оюунгэрэл сайдын нөлөөлөл  энэ хэрэг дээр харагдсан уу. Тэрбээр санасандаа хүрч МИАТ-ийн хэргийг хөнгөрүүлэхэд нэмэр дөхөм болов уу. Гэхдээ энэ бол зарим хүмүүсийн л таамаг төдий.

Харин нөгөө хэсэг  нь анхнаасаа “хэрэг “ биш байсан бол ард түмний мөнгийг луйвардчихсан ч юм шиг ингэж сүр дуулиан тарих хэрэггүй байсан юм гэлцэнэ.  Учир нь өнгөрсөн оны  нэгдүгээр  сараас энэ хэрэгт холбоотой арав гаруй хүнийг цагдан хорьж  шалгаж байсан. Тухайн үед олон ч хүнийг хамруулж байсан, сүр дуулиантай хэрэг.
Харин явцын дунд найман хүний хэргийг шүүхэд шилжүүлсэн ч  замын дундаас хэд хэдэн хүнд холбогдох хэрэг хэрэгсэхгүй болж, хяналтын шатанд таван хүний ялыг хөнгөрүүлж шийдвэрлэсэн нь энэ.

Ц.Оюунгэрэл  сайд  анх “МИАТ-ийн экс  удирдлагуудын хэргийг нэг талыг барилаа.  МИАТ-ийн хэрэг миний нэр дэвшсэн тойрогт болж байгаа үйл явдал.  Ц.Орхон, Б.Бат-Эрдэнэ нарын ар гэрээс надад хандсан өргөдөл ирсэн. Энэ хэргийг шүүх явцад хэрэгт нэр холбогдсон хүмүүсийн хийсэн, хийгээгүй үйлдлийг ялгаж, салгах ажил маш муу байгаа” гэж байв. Тэгвэл Хяналтын шатны шүүхээр Ц.Орхон, Б.Бат-Эрдэнэ нарыг  Ч.Хоролсүрэн, Б.Эрдэнэбилэг нартай үгсэн хуйвалдаж бүлэглэсэн нь тогтоогдоогүй гэж үзээд Эрүүгийн хуулийн 272.2-т зааснаар албан үүрэгтэй хайнга хандсан гэх үндэслэлээр хорих ялыг  тус бүр гурван жил болгож хөнгөрүүлсэн. Яг л Ц.Оюунгэрэл сайдын хүссэнчлэн болсон.

  Ингэснээр Ц.Орхон, Б.Бат-Эрдэнэ нар МИАТ-ийн хөрөнгийг гадагш нь шилжүүлэх хэрэгт оролцсон  ч  бусадтай бүлэглэсэн нь тогтоогдоогүй учраас ялыг нь хөнгөрүүлж, төрийн өмчит аж ахуйн нэгжид удирдах албан тушаал хаших эрхийг нь хоёр жилээр хасах төдийхнөөр  мултарч чадлаа.

Тэдэнд анхан болон давж заалдах шатны шүүхээс 11-12 жилийн хорих ял оноож байсан юм. Харин Ч.Хоролсүрэн, Б.Эрдэнэбилэг нарын мөнгө угаасан хэрэг автоматаар хэрэгсэхгүй болсноор 13 жилийн хорих ялын хэмжээ 7-8 жил болж буурав.

Ц.Оюунгэрэл сайд байр сууриа илэрхийлээд зогсохгүй хууль шүүхийн ажиллагаанд нөлөөлөхөөр хөөцөлдөж байсан талаар эх сурвалж  тухайн үед мэдээлж байсан. Тэгэхээр түүний нөлөөлөл энэ хэрэг дээр харагдав уу? гэх хүмүүсийн хардлага улам даамжирч эхэллээ.

Дээрх эрх мэдэлтнүүдийн гар хөл болж, гадаадад мөнгө шилжүүлэх, гадаадаас орж ирсэн мөнгийг дансаараа дамжуулах  зэрэг үүргийг гүйцэтгэж  байсан гэх Г.Саранчимэгт хоёр шатны шүүхээс 11 жил нэг сарын хорих ял оноосон ч гурван жил болж буурсан юм.

Мөрдөн байцаалтын шатанд  дээрх нэр бүхий хүмүүс 9.3 тэрбум төгрөгийн хохирлыг Монгол Улсын төрд учруулсан гэж тогтоож байв. Үүнээс тэдний хувийн данс болон компаниудынх нь дансаар 4.3 тэрбум төгрөг нь буцаж орж ирсэн байдаг. Мөн мөрдөн байцаалтын шатанд хэрэгт холбогдсон хүмүүсийн нийт 16.5 тэрбум төгрөгийн банкин дахь хадгаламж, хувь нийлүүлсэн 27 компанийн хөрөнгө, автомашин, бусад үл хөдлөх хөрөнгийг битүүмжилж байсан гэхээр хэдий хэмжээний хөрөнгө чинээтэй эрхмүүд болох нь тодорхой байдаг.