ХААИС-ын захирал асан Б.Бямбааг улсын эд хөрөнгө шамшигдуулсан, албан тушаалаа урвуулан ашигласан хэмээн өнгөрсөн сард цагдан хорьсон. Тэгвэл түүнийг батлан даалтад гаргаж, гадуур байцааж эхэлсэн байгаа.

  Б.Бямбааг Улсын мөрдөн байцаах газрын Эдийн засгийн гэмт хэрэгтэй тэмцэх хэлтсээс түүнийг ажилтнуудынхаа нийгмийн асуудлыг шийдэх нэрийдлээр сургуулийн эзэмшил газраас "Химон констракшин" ХХК-д өгч, ямар ч тендергүй барилга бариулсан гэж буруутгаж байгаа юм. Мөн 20 байрны үнэнд 1,3 тэрбум төгрөг сургуулиас нэмж шилжүүлсэн. Үүнээс 16 байр авсан хэдий ч ойр тойрны цөөн хүмүүст хуваарилсан хэрэгт буруутган шалгаж байгаа аж. Тэгвэл хэдхэн хоногийн өмнө  түүнийг Улсын мөрдөн байцаах газар, Нийслэлийн прокурорын газрын тогтоолын дагуу Мал эмнэлгийн хүрээлэнгийн захирлын ажлаас нь түдгэлзүүлжээ.

Тэгвэл энэ хэргийн талаар УМБГ-ын дэд дарга Д.Отгонжаргал хэлэхдээ " ХААИС-ын захирал асан Б.Бямбаад холбогдох 2013 онд сургуулийн хашаанд өөрийн хувийн хөрөнгөөрөө барьсан гурван давхар дутуу баригдсан обьектийг олон улсын хэл судлалын төвийн барилга нэртэйгээр тендерийн материал болгон ажил гүйцэтгэлийн гэрээг хуурамчаар гүйцэтгүүлэн 771 сая төгрөгийг тус сургуулийн төсвийн хөрөнгөөс гаргуулан завшиж улсад онц их хэмжээний хохирол учруулсан. Тиймээс энэ үйлдэлд Монгол Улсын эрүүгийн хуулийн тусгай ангийн 150 дугаар зүйл буюу бусдын эд хөрөнгийг завшиж үрэгдүүлэх гэсэн гэмт хэргийн бүрэлдэхүүнтэй байна гэж үзэн яллах дүгнэлт үйлдүүлэн Прокурорын газарт шилжүүлээд байна"  гэв.