Энэ оны хоёрдугаар сарын 27-нд БНХАУ-ын “Шинжинь” хотод зохион байгуулагдсан гоёл чимэглэлийн худалдааны танхимаас 10 сая юань буюу 2.3 тэрбум орчим төгрөгний үнэ бүхий сувдан эдлэлийг манай улсын иргэн Э, М нарын дөрвөн хүн бүлэглэн хулгайлсаныг илрүүлжээ. Ингээд Монгол Улсын нутаг дэвсгэрт хулгайн эд зүйлээ хууль бусаар нэвтрүүлэн, өөрсдийн орон байрандаа хадгалж байсан байна. Нийтдээ 6480 грамм хэмжээтэй 3089 ширхэг сувд, 27 ширхэг байгалийн нил эрдэнэлийн чулуу буюу “амитис” гэж нэрлэгддэг чулуу зэргийг  эд мөрийн баримтаар хураан авч, эдгээр хүмүүсийг эрүүгийн хариуцлагад  татан шалгаж байгаа аж. Тиймээс энэ хэрэгт Монгол Улсын эрүүгийн хуулийн 145.4 буюу бусдын эд хөрөнгийг бүлэглэн хулгайлсан, онц их хэмжээний хохирол учруулсан гэдэг үндэслэлээр мөрдөн байцаалтын ажиллагааг явуулж байгаа гэнэ. Харин мөрдөн байцаалтын шатанд Монгол Улсын иргэн М нь мөн 2012 оны зургаадугаар сард Тайвань улсын үнэт эдлэлийн дэлгүүрээс шүрэн эдлэл хулгайлсан нь тогтоогдсон аж. Түүнчлэн иргэн Д нь өнгөрсөн оны 5-6 сард Хонконг  улсад зохион байгуулагдсан олон улсын үнэт эдлэлийн үзэсгэлэнгийн танхимаас нийтдээ 19 ширхэг хэлхээ, 1396 грамм шүр хулгайлан Монгол Улсад ирсэн зэргийг тогтоожээ.