Мансууруулах, сэтгэцид нөлөөлөх эм бэлдмэл зэргийг таслан зогсоох чиглэлээр “Мансуурал” арга хэмжээг Нийслэлийн цагдаагийн газар, ЭМЯ-ны сайдын 2011 оны 12 дугаар сарын 20-ны өдрийн 400 дугаартай "мансуурах сэтгэцид нөлөөлөх эмийг импортлох, үйлдвэрлэх, ханган нийлүүлэх журмын дагуу" нэгдүгээр зэргийн стандарт шаардлагыг хангасан эмийн сан зэрэгт шалгалт явуулсан байна. Үүнд, “Монос”, “Эм эмпекс” улсын хэмжээнд сэтгэцид нөлөөлөх эм бэлдмэлийн мансуурах төрлийн нийт 82750 ширхэг эм тариаг ханган нийлүүлсэн байдалд шалгалт хийжээ. Ингээд нийслэлийн 186 эмийн сан, улсын хэмжээний 413 эмийн сан хамрагдахад 22 зөрчил илэрснийг холбогдох арга хэмжээ авч ажилласан байна. Мөн Гаалийн ерөнхий газрын хууль сахиулах худалдааны газруудтай хамтарч албаны нууцлалтайгаар энэ оны аравдугаар сард боомтуудад шалгалт хийжээ. Шалгалтын хүрээнд Улаанбаатар хотын гаалийн баталгаат гурван бүс, Дорноговь аймгийн хилийн боомт, Сэлэнгэ аймгийн Алтанбулаг дахь  хилийн боомтууд ажиллажээ. Улмаар шалгалтын явцад Монгол Улсын хилээр “ICE” сэтгэцид нөлөөлөх эм бэлдмэл орж ирсээр байгаа нь тогтоогдсон байна. Ингээд манай улсын иргэдтэй холбогдох хэргүүдийн мөрдөн байцаалтын ажиллагаа эрүүгийн хэрэг үүсгэгдэн шалгагдаж байгаа аж.