Вашингтонд төвтэй “Ptotection Project” хэмээх хүний эрхийн судалгааны байгууллага Монголд жил бүр 3000-5000 мянган хүн, хүн худалдаалах гэмт хэргийн золиос болдог гэсэн судалгаа гаргажээ. Монгол бол Хятад, Макао, Өмнөд Солонгос, Малайз зэрэг Азийн орнууд болон Зүүн Европт эмэгтэйчүүд, хүүхдүүдийг наймаалдаг үндсэн улс болон хувирч байгаа гэж үзсэн байна. Охид эмэгтэйчүүдийг Улаанбаатар, Эрээн, Бээжин, Макаогаар дамжуулан худалдаалж байна гэсэн эмгэнэлтэй мэдээлэл гаргажээ. Нийслэл Улаанбаатар хотод зочид буудал, саун, бар, шөнийн клуб зэргээр охидыг дотооддоо зарж, үнэлдэг. Нийслэл болон хөдөө орон нутагт, гэр бүл, найз нөхөд, танил талынхаа нөлөөгөөр биеэ үнэлэх, худалдагдах нь цөөнгүй. Хамгийн ноцтой нь Монголд насанд хүрээгүй охидтой секс хийх сонирхолтой хүмүүс ихэсч байгаа нь тулгамдсан асуудал болж байна. Энэхүү судалгаанд гадаадын бизнес эрхлэгчид насанд хүрээгүй охидтой секс хийхээр урьдчилан тохирч, манайд ирдэг болсон талаар дурджээ. Монгол дахь секс зуучлалыг зохион явуулдаг албан ёсны зөвшөөрөлгүй байгууллагууд Япон, Солонгосын хувь иргэдийг зуучлах үйлчилгээ үзүүлдэг гэнэ. Орон гэргүй, амьдралын боломж нөхцөл тааруу эсвэл албадлагаар, Япон Солонгосчуудад худалдагдах тохиолдол байгаа талаар дурдсан байх юм. Хүүхдийн секс зуучлал хэмээх ойлголт зөвхөн манайд биш дэлхий нийтийн тулгамдсан асуудал болж, энэ хэргийн золиос болсон 2 сая хүний бий гэсэн судалгаа гаргажээ. 
Үүнээс гадна Хятад, Солонгосын иргэдийн сүйт бүсгүй болох гэсэн хүслийнхээ улмаас боолын гэрлэлтийн золиос болж буй бүсгүйчүүд цөөнгүй. Санхүүгийн бэрхшээлээ шийдэхийн тулд гадны иргэдтэй гэр бүлж болж буй эмэгтэйчүүд нөхөр болох хүнтэйгээ нэг ч удаа уулзаагүй байгаа нь ийм эрсдэлд оруулж байна.
Монголчууд эмэгтэйчүүд, хүүхдүүдийгээ хил давуулан худалдаалж, эрчүүдийгээ гадаадын хөдөлмөрийн боол болгож буй талаар “Америкийн хүний наймааны судалгааны байгууллага”-ын тайланд дурджээ. Хэвлэл мэдээллийн хэрэгсэл, олон нийтийн дунд хүчтэй шүүмжлэл гарсаны дараагаар эрх баригчид энэ тал дээр анхаарна гэдгээ мэдэгдэж, бодлого баримтлахаа амласан хэмээн дээрх судалгаанд онцолсон байна. Монголын бодлого боловсруулагчид хүний наймааны асуудалтай тэмцэх хууль тогтоомж гаргасан ч багагүй хүчин чармайлт шаардлагатай байгааг анхааруулжээ. Сүүлийн хэдэн жилд хүний наймаа, боолын хөдөлмөрийн асуудлаар хууль хяналтын байгууллагын ажилтнуудад хангалттай сургалт мэдээлэл өгөөгүй, уг асуудалтай тэмцэх хөрөнгө санхүүгийн эх үүсвэрийг хангалттай тусгаагүй зэргийг шүүмжилсэн байна.
Сэтгэгдэл (11)