Тайландад Ерөнхий сайд Инглак Шинаватраг огцруулах шаардлага тавьсан иргэдийн жагсаал найм дахь өдрөө үргэлжилж байна. Жагсагчид яамны барилгуудыг эзлэх гэж дайрч байгаа бол цэргийнхэн хамгаалалтанд гарч, иргэд рүү нулимс асгаруулагч хий цацаж байгаа талаар "BBC" мэдээллээ.
    Засгийн газрыг эсэргүүцэгчид хэд хэдэн телевизийн байрыг эзэлж, нэвтрүүлгүүдийг хяналтандаа авсан байна. Хэдийгээр Ерөнхий сайд Инглак Шинаватра иргэдийн эсрэг аль болох бага хүч хэрэглэнэ гэсэн ч жагсагчдын хүч улам нэмэгдсээр байгаа юм. Өчигдөр нэгэн их сургуулийн гадаа болсон үймээнээр буун дуу гарч, 21 настай оюутан нуруундаа буудуулан амиа алдсан байна. Өөр таван хүн гэмтэж, эмнэлэгт хүргэгдсэн ч буудсан этгээдийг одоогоор олоогүй байгаа аж.

  Засгийн газрыг эсэргүүцэгчид Ерөнхий сайд Инглак Шинавтраг өөрийн ах Таксин Шинаватрад эрх мэдэл өгөх хууль гаргах гэж байна хэмээн ийнхүү үймээн дэгдээсэн. Өнгөрсөн долоо хоногт  Инглак Шинаватраг огцруулах асуудлаар парламент нууцаар санал хураахад, гишүүдийн олонх нь дэмжээгүй юм. Парлементын гишүүдийн 297 нь ерөнхий сайдыг дэмжсэн бол 134 нь эсэргүүцжээ.