Америкт 1986-2012 оны хооронд хийгээгүй хэргийнхээ төлөө ял эдэлж буй 2000 гаруй хүн байгаа гэсэн судалгааг Мичиганы хуулийн сургуулийн цуглуулсан баримтад дурджээ. Үүний тод жишээ бол эхнэрээ хөнөөсөн хэргээр 25 жилийн турш ял эдэлсэн Майкл Мортон билээ. CNN агентлаг Мортоны амьдралыг харуулсан “Хуурамч зүүд” нэртэй баримтат кино хийсэн байна. 1986 оны наймдугаар сарын 12-нд 32 настай Майкл Мортоны эхнэр гэртээ нас барсан байхыг цагдаа нар олсон юм. Тухайн үеийн прокурорууд хангалттай нотлох баримт, гэрчийн мэдүүлэггүйгээр түүнийг хорьж, ял тулгажээ. Ингээд халуун ам бүл хагацаж, 3 настай Эрик хүү өнчирч хоцорчээ. Эрик хүү хамаатныхаа айлд өсч хүмүүжсэн бөгөөд эцгийгээ шоронд жилд хоёр удаа эргэж ирдэг байжээ. Гэхдээ тэрээр эцэг, эхийнхээ талаар хэнд ч ярихгүй хүсээгүй тул овгоо өөрчлөн амьдарч байсан юм. Харамсалтай нь Мортоны хэргийг дахин нягталж, хэргийн газраас олдсон цус, үс зэргийг нягталж үзэхэд өөр эрийн ДНК илэрсэн байна. Энэ хэргийг үйлдсэн этгээд Марк Норвүд гэгч болох нь нотлогдсон ажээ. Харамсалтай нь, жинхэнэ хэрэгтэн Мортоны эхнэрийг хөнөөснөөс хойш хоёр жилийн дараа дахин нэг эмэгтэйн амийг хөнөөсөн гэнэ. Одоо уг хэргийн үнэн мөн тайлагдаж, жинхэнэ хэрэгт яд эдлүүлж байна. Мортон ч 2011 онд эрх чөлөөтэй болсон юм. Гэсэн хэдий ч залуу, халуу насаа өргөст торны цаана өнгөрүүлсэн хохирогчид Америкийн нийгэмд цөөнгүй бий гэнэ. Энэ бол туйлын харамсалтай жишээ гэж цагаатгалын төслийн мэргэжилтэн ярьжээ. Харамсалтай нь тухайн үеийн хууль хяналтын ажилтнууд хэргийг тодорхой санадаггүй тул хилсээр ял эдэлж буй хүмүүсийн эрх ашгийг хамгаалж, тэдэнд туслах сайн дурын хуулийн байгууллага бий болсон байна.