Ливаны Баалбек хотод Хезболла зэвсэгт бүлэглэлийн командлагч Хассайн Лаккисыг оршуулах ёслол болж өнгөрлөө. Лаккисыг энэ Мягмар гаригт Бейрут хотын ойролцоо орших гэрийнхээ гадна зогсож байхад толгойд нь буудаж амь насыг нь хөнөөсөн юм. Хезболла бүлэглэлийн дайчид уг хэрэгт Израйльчуудыг буруутгаж байгаа ч тэд үүнийг үгүйсгэж байна. Лаккисын талаарх хувийн мэдээлэл цөөн байдаг ч түүнийг зэвсгийн үйлдвэрт шинжээчээр ажиллаж байсныг бүгд мэднэ. Тэрээр Хезболла бүлэглэлийн удирдагч Хассан Нашраллатай хамгийн ойр ажилладаг байжээ. Хассан Нашраллаг Бейрут хот дахь Ираны элчин сайдын яаманд бөмбөг дэлбэлсэн хэргийн цаана Саудын Араб байгаа гэж хэлсний маргааш Лаккис алагдсан нь сэжиг төрүүлж байна. Иран улс бол Хезболла бүлэглэлийн гол санхүүжүүлэгч бөгөөд Башар Ассадын Засгийн газрын төлөө Сирийн дайнд дайчдаа илгээж байлаа. Харин Саудын Араб улсад суннит шашинтнууд зонхилдог тул Сирийн босогчдын талыг дэмжиж иржээ. Хезболлагийн дайчид Сирийн Засгийн газрын хандив тусламжийг саатуулахгүйн тулд туслаж, зөрчилдөөний гол төвүүдэд хяналтаа бэхжүүлж байлаа. Командлагчийн үхэлд Израйльчуудыг буруутгах шалтгаан бий. Учир нь 2006 онд Хезболлагийн дайчид Израйльчуудтай 34 өдрийн дайн хийсэн юм. Гэхдээ хэргийг үйлдсэн байж болзошгүй сэжигтний мэдээлэл одоогоор ил болоогүй байна.