Эмнести интернэйшл байгууллагын хиймэл дагуулаар авсан зураг Хойд Солонгосын хамгийн том улс төрийн шоронд хоригдогсдын тоо өссөн болохыг гэрчилжээ. Энэ зургаас харахад шорон томорч харагдсан тул Хойд Солонгос дахь хүчирхийлэл даамжирч байгааг тус байгууллагаас шүүмжилж байна. Хойд Солонгосын удирдагчид улс төрийн шорон байдаг гэдгийг үгүйсгэдэг ч 2011-2013 онд авсан хиймэл дагуулын зургаараа ийм дүгнэлтэд хүрчээ. Эмнести интернэйшл байгууллага 560 километр квадрат талбайтай буюу Вашингтон хотоос гурав дахин том хэмжээтэй Хойд Солонгосын 16 кампустай шоронгуудад 20 мянган хүн хоригдож байгаа гэж үзжээ. Тус улс нийтдээ 120,540 километр квадрат газар нутагтай юм байна. Тэд Хойд Солонгосын шоронд ажиллаж байсан ахмадтай уулзаж, хоригдлуудын булшийг өөрсдөөр нь ухуулж, алхаар хүзүү рүү нь цохиж хөнөөдөг байсан гэсэн мэдээллийг авсан байна. Мөн шоронгийн эмэгтэй хоригдлуудыг харгалзагч нар нь хүчинддэг. Тэдэнд хүчиндүүлсэн эмэгтэй нууцыг задруулах аюултай тул үхэх ёстой байдаг. Иймэрхүү аймшигтай хэрэг удаа дараа гарсан гэж ахмад ярьжээ. Өмнө нь тус улсад өдрийн 10-12 цагийн турш ажиллуулж, боолын хөдөлмөр эрхлүүлдэг 15-р кампус байгааг мэдэгдсэн. Энэхүү шорон нь 370 километр квадрат, 50 мянган хүнтэй шорон гэж тооцоолжээ. Хүний эрхийг ноцтой зөрчиж байгаа үйлдлүүдээ таслан зогсоохыг олон улсын байгууллагууд Хойд Солонгост сануулсаар байна.