Ер нь манай улсад уул уурхай гэлтгүй зарим компаниудыг "шантаажлах" аргаар мөнгө олох бүлгүүд цөөнгүй. Өмнө нь төрийн бус байгууллагууд, зарим нэг хөдөлгөөнүүд янз бүрийн аргаар аялал жуулчлал, уул уурхайн компаниудыг "шатнаажилж" хэд арван цаас олдог байсан. Тухайлбал, "Гал үндэстэн" зэрэг хөдөлгөөн, холбоодууд энэ төрлийн аргаар бизнес хийдэг байсан нь илэрч, одоо ч хууль хяналтынханаар шалгуулж байгаа.  Гэтэл өдгөө бүр төрийн албан хаагч иргэдийг турхирч компанируу дайрч байгаа талаарх мэдээлэл бидэнд ирлээ. Тодруулбал,   Төв аймгийн Батсүмбэр сумын нутагт байрлах "Сансари" аялал жуулчлалын компанируу тус сумын Засаг дарга Д.Ганбаяр нь нутгийн иргэдийг турхин дайрч, газраас нь авах гэж улайрч байгаа аж. Улмаар энэ асуудал даамжирч тухайн компанийн эрх ашгийг хөндөөд эхэлсэн тул тус аймгийн Засаг даргыг шүүхэд хүртэл өгчээ.

Энэ талаар "Иргэдийн шударга шүүх" ТББ-д ч гомдол, санал ирээд байгаа юм байна. Тиймээс "Сансари" компанитай холбоотой маргааны талаар "Иргэдийн шударга шүүх" ТББ-ын тэргүүн Х.Бат-Ялалтаас тодруулсан юм. Тэрбээр "Төваймгийн Батсүмбэрт аялал жуулчлалын чиглэлээр үйл ажиллагаа явуулдаг "Сансари" компани Засаг даргатайгаа шүүхдэлцэж байгаа талаарх мэдээлэл бидэнд байна. Учир нь "Сансари" ХХК нь тухайн газрыг хувьчилж аваад удаж байгаа аж. Өөрөөр хэлбэл, эзэмших эрхийн бичиг, гэрчилгээ бүх зүйл хууль ёсных юм байна лээ. Гэтэл засаг дарга нь газраас нь өөр хүмүүст өгөх гээд тухайн компанийн эрх, эрх чөлөөнд халдаад байгаа. Улмаар хэвийн үйл ажиллагаа явуулж байхад нь тухайн нутгийн иргэдийг турхирч, үйл ажиллагаанд нь халдаад байгааг тэдний зүгээс хэлж байсан. Өөрөөр хэлбэл Засаг дарга нь захирамж гаргачихаад эрх ашиг нь хөндөгдөж байгаа этгээдэд мэдэгдэхгүй жил орчим болсон байсан" гэв.

Уг нь Баянголын аманд чихрийн шижин өвчнийг эмчлэх ховор шинжтэй Сахарын рашаан бүхий Түшээ гүн хэмээх үзэсгэлэнт сайхан газар бий. Тэнд орших Баянгол амралт буюу хуучнаар Барилгачдын амралтын барилгыг 2005 онд "Сансари" компанид хувьчилсан байдаг.

Гэтэл Баянгол амралтын газрын барилгыг эзэмшигч "Сансари" ХХК нь 2012 онд Баянгол амны 400 га орчим газрыг эзэмшилдээ авах зорилгоор хайс хашаа барьж иргэдийн малын бэлчээр, хадлангийн талбай, нутгийн иргэдийн шүтээн болсон тахилгатай уул, рашаан ус зэргийг хашиж орон нутгийн иргэдийн амьдрах нөхцлийг хязгаарлаж, иргэдийг газар нутгаас нь хөөж эхэлсэн гэх мэдээлэл гараад байсан юм.

Тэгвэл энэ асуудал бүр даамжирч "Сансари" компанируу нутгийн иргэд дайрч, сумын засаг дарга Д.Ганбаяр нь бусдыг турхирч компанийн эрх ашгийг зөрчиж эхэлсэн нь энэ юм.

Дашрамд хэлэхэд, Төв аймгийн Батсүмбэр сумын Засаг дарга Д.Ганбаяр нь цагдаагийн газарт шалгагдаж байгаа аж. Түүний ихээхэн хэмжээний модыг хууль бусаар бэлтгэж, борлуулсан тухай иргэд хоёр жилийн өмнөөс хуулийн байгууллагад ханджээ. Гэвч өнөөг хүртэл шийдэгдээгүй аж. Харин тус сумын иргэн Д.Ганхуяг Ерөнхий прокурор Д.Дорлигжав, Хуульзүйн сайд Х.Тэмүүжин нарт өргөдөл бичсэнээр уг хэргийг дахин шалгаж эхэлжээ. Батсүмбэр сумын иргэд Засаг дарга Д.Ганбаярынхаа хууль бусаар мод бэлтгэсэн, борлуулсан хэргийг дүрс бичлэг, гэрэл зургаар баталгаажуулсан байна