Хэдэн долоо хоног үргэлжилсэн тэмцлийн дараа Тайландын эсэргүүцэгчид ерөнхий сайд Инглак Шинаватраг төрийн эрхнээс шахан зайлуулах хэрэгтэй гэсэн бодолдоо үнэнч хэвээр байна. Жагсагчдын толгойлогч буюу ерөнхий сайдын төлөөлөгч асан Судеп Дауксубан харилцан ярилцахаас татгалзаж, өнөөдөр гэхэд засгийн эрхнээс түлхэн унагах сүүлийн арга хэмжээг авна гэдгээ мэдэгджээ. Ерөнхий сайд Шинаватра улс төрийн хямралыг шийдвэрлэхийн тулд бүх нийтийн санал асуулга явуулах санал гаргаад байсан юм. Тэрээр сөрөг хүчний талтай зөвшилцөлд хүрч чадвал парламентыг татан буулгаж, шинээр сонгууль явуулах санал гаргасан. Жагсагчид одоогийн эрх баригч хатагтай Шинаватраг огцруулж, оронд нь “Ардын зөвлөл” намыг сонгууль явуулахгүйгээр төр бариулах хүсэлтэй байгаа ажээ. Тайландын парламентын 500 суудлын гуравны нэг буюу 153 суудлыг эзэлдэг Ардчилсан намынхан суудлаа өгөхөд бэлэн байгаа гэдгээ мэдэгдлээ. Тэд эрх баригч Pheu Thai намыг болон Шинаватрагийн цаана түүний ах Даксины дэглэм ноёрхож байгааг эсэргүүцэж байна хэмээн дээрх шийдвэрийг гаргасан байна. Ардчилсан намаас сонгогдсон парламентын гишүүн Сансерн Самалапа “Огцрох болсон шийдвэр нь парламент дахь Даксины дэглэмийг үгүйсгэсэн зорилготой холбоотой” хэмээн Фэйсбүүк хуудаснаа тайлбарлажээ. Жагсагчдын толгойлогч Судеп Дауксубан нь мөн Ардчилсан намын гишүүн юм. Өнөөдөр эсэргүүцэгчид Засгийн Газрын ордныг 9 талаас нь дайрч, томоохон жагсаал зохион байгуулж, огцруулах сүүлийн оролдлогоо хийнэ гэж мэдэгдсэн байна. Хэрэв ерөнхий сайд огцрохоор шийдвэл, дахин сонгууль явуулахаас өөр аргагүй гэж ажиглагчид дүгнэжээ.
