“Анагаах ухааны салбарын 2013 оны ололт” үзэсгэлэн, цуврал лекц Эрүүл мэндийн яамны Сургалт мэдээллийн төвд болж байна. Тус үзэсгэлэнд Нийгмийн эрүүл мэнд, эмнэлзүй, биоанагаах, эмзүй, уламжлалт анагаах ухааны чиглэлээр эрдэм шинжилгээний ажил эрхлэдэг байгууллагууд 2013 онд бүтээсэн шинэ бүтээлүүдээ дэлгэн харуулж байгаа юм.

Үзэсгэлэнгийн үеэр Эрүүл мэндийн дэд сайд Ж.Амарсанаа бүтээлүүдтэй танилцсан бөгөөд оролцогчдод хандан “Хүн амд үзүүлэх эрүүл мэндийн тусламж үйлчилгээг хөгжүүлэх, энэ чиглэлээр төрөөс баримтлах бодлого, шийдвэрийг оновчтой төлөвлөж хэрэгжүүлэхэд шинжлэх ухааны нотолгоо нэн чухал билээ.

Үзэсгэлэн гарахын зэрэгцээ 2013 онд хэрэгжүүлж дүүргэсэн төслүүдийн үр дүнгээр цуврал лекц зохион байгуулж байгаа нь өөрийн хийсэн судалгааны оргил хэсгийг нийтэд тайлбарлан таниулах чухал ач холбогдолтой юм.

Ийм үйл ажиллагааг 2012 оноос хэрэгжүүлж байна. Энэ жил илүү ололттой, туршлага хуримтлуулан ажиллалаа. Цаашид жилээс жилд тус үйл ажиллагаа өргөжиж, шинэ мэдлэг, туршлага, шинэ бүтээлийн индэр болж анагаах ухааныг хөгжүүлэхэд үнэтэй хувь нэмэр оруулна гэж итгэж байна” хэмээлээ.