Өнөөдөр дэлхий нийт Өмнөд Африкийн нэрт удирдагч агсан Нелсон Манделагийн дурсгалыг хүндэтгэж байгаа билээ. Өмнөд Африкийн цэнгэлдэхэд 95 мянган хүн цуглаад байгаагийн дотор дэлхий нөлөө бүхий эрхмүүд ч бий. Нийт 91 улсын төрийн болон Засгийн газрын тэргүүн, 10 хуучин удирдагч, 86 улсын төрийн төлөөлөгч, 75 нэр алдартай хүн арга хэмжээнд оролцож байна. Харин Буддын шашны тэргүүн, Далай лам Манделаг хүндэтгэх арга хэмжээнд оролцож чадахгүй болжээ. Учир нь Далай лам хоёр ч удаа виз хүсээд авч чадаагүй гэнэ. Түүний хэвлэлийн төлөөлөгч арга хэмжээнд оролцож чадахгүй болсон шалтгааныг дэлгэрэнгүй тайлбарлаагүй байна. 2009 онд Өмнөд Африкт болсон Нобелийн энх тайвны хуралд Далай ламыг оролцуулахыг хориглосон бол 2011 онд өргөдөл бичихээс нааш виз олгохгүй гэж үзэж байжээ. Далай лам 1959 онд Хятадаас дүрвэн гарсаны дараагаар Энэтхэгийн Дарамсалад суурьшсан юм. Тэрээр Түвдийн эрхийн төлөө тэмцдэг ч Хятадууд түүнийг салан тусгаарлагч гэж шүүмжилдэг.