12 настай Кю охиныг нэгэн эр зочид буудалд хоёр хоног хүчирхийлсэн юм. “Би тухайн үед ямар ажил гэдгийг нь мэдээгүй” хэмээн өдгөө 14 настай, нууц газар амьдарч байгаа Кю охин ярьж байна. Тэр аймшигт өдөр шархалсан зүрхтэй гэртээ харьсан ч тамын амьдрал нь үүгээр төгсгөл болоогүй билээ. Ээж Кю нь янхны газар аваачиж зарсан байна. Тэнд яг шорон шиг, өдөрт 3-6 хүнд хүчиндүүлдэг байсан хэмээн Кю охин өгүүлжээ. Тэр газраас гэртээ эргэж ирсэн ч ээж нь  Тайландын хилээс 400 километрийн цаана байдаг янхны газар аваачиж, дахин зарсан гэнэ. Ингээд охин гэрээсээ зугтах ёстойгоо ойлгосон байна. Охины ээж Неонг CNN агентлагт “Хүүхдээ зарахад зүрх шархалсан. Гэхдээ одоо би одоо юу хэлэх вэ? гэж ярьжээ. Түүнээс гадна охиноо зарсан хэрэгт буруутгагдаад байгаа Камбожи эмэгтэйчүүд санхүүгийн хямралаас гарахын тулд ийм алхам хийсэн гэж тайлбарлаж байгаа юм. Тэд өрөө дарахын тулд ийм хэрэг үйлдсэн гэж өөрсдийгөө зөвтгөдөг ажээ. Үүнээс гадна Кю охины ойрын хамаатан болох 13 настай Сепак энэ хэргийн золиос болжээ. Түүнийг эмнэлэгт онгон эсэхийг нь шалгуулсаны дараа Хятад эрд 800 доллалаар зарсан гэдэг. Тэрээр “Надад маш хэцүү байсан. Ээж маань надаар яагаад ийм зүйл хийлгүүлж байгааг ойлгохгүй байсан” хэмээн өгүүлжээ.

    59 настай Америкийн оршин суугч Дон Брюстер “Би ээж нь охиноо зарсан гэж бодохоор ямар мэдрэмж төрдөгийг мэдэхгүй юм. Охиныг хүчиндүүлж байхад ээж нь мөнгө авах гээд машинд хүлээж байдаг. Ээж нь охиныг хүчирхийлэх хүмүүст өөрөө түлхүүр өгдөг” гэж хэргийн талаар ярьжээ. Брюстер сүмийн номлогч хүн бөгөөд 2009 оноос эхлэн Камбожи дахь хүн худалдаалах хэрэгтэй тэмцэж байна. Авилгал, ядуурал газар авсан энэ улсад хүүхэд худалдаалах гэмт хэрэг эрс өсч байгааг шинжээчид шүүмжилдэг. Юнисеф байгууллагын судалгаагаар Камбожид хүүхэд худалдаалдаг 10-30 мянган хүн байгаа гэнэ. Азийн хамгийн ядуу орнуудын нэг болох Камбожид зарим иргэд нь өдөрт 2 долларын орлоготой байдаг байна.