Тайландын ерөнхий сайд асан Абхисит Вежжажива 2010 онд болсон бослого хөдөлгөөнөөр амь үрэгдсэн хүмүүсийг үхэлд хүргэсэн хэрэгт буруутгагдаж эхэллээ. 2010 онд Тайландад болсон үймээний улмаас 90 гаруй хүн амиа алдсан юм. Тухайн үеийн ерөнхий сайдаар ажиллаж байсан Абхисит нь Ардчилсан намыг удирдаж байсан бөгөөд хэрэгт буруугүй гэж үгүйсгэсээр батлан даалтад гарч байжээ. Одоогийн ерөнхий сайд Инглак Шинаватрагийн эсрэг хүчтэй шүүмжлэл өрнөж байгаа энэ үед дээрх хэрэгт ял оноох асуудал дахин сөхөгдөж эхэллээ. 2010 онд ноён Абхиситын төлөөлөгчөөр ажиллаж байгаад одоогийн жагсаал цуглааныг тэргүүлж байгаа эсэргүүцэгч Судеп Дауксубан ч мөн адил дээрх хэрэгт холбогдож байгаа гэнэ. Гэхдээ Судеп шүүхийн сонсголыг түр хугацаагаар хойшлуулжээ. Абхисит, Судеп нар өмнөх удирдагч Даксин Шинаватраг шахан зайлуулсаны дараа хэдэн мянган дэмжигчид Бангкок хотын зарим газрыг эзлэх үед эрх мэдэлтэй байсан юм. Тэд эсэргүүцэгчдийг арчиж хаяхын тулд цэргийн эрх мэдлээ ашигласан гэж шүүх үзжээ. Үүнийг 14 настай охин, 43 настай таксины жолооч буудуулж нас барсан зэрэг баримтуудаар нотлож байна. Өнгөрсөн ням гаригт Абхисит болон Ардчилсан намын бусад хууль батлагчид парламентаас огцорч, эсэргүүцэгчидтэй нэгдэх болжээ. Даваа гаригт ерөнхий сайд Инглак Шинаватра дахин сонгуулийн товыг хоёрдугаар сарын 2-нд гэж зарласан байна. Гэвч Тайландын ерөнхий сайд Инглак Шинаватра сонгууль явуулахаас нааш огцрохгүй гэж мэдэгдсэн юм. 
