“Орос, Украйн улс худалдааны харилцаагаа сайжруулахын тулд замын зураглалаа батлахаар төлөвлөж байна” гэж Украйны ерөнхий сайд Микола Азаров дотоодын телевизэд өгсөн ярилцлагадаа мэдэгджээ. Энэхүү мэдэгдэл нь Украйны ерөнхийлөгч Виктор Янукович болон түүний Засгийн Газар алсдаа Европын холбооноос тусгаарлах зорилготой байгааг харууллаа. Энэ нь тэдний үзэл бодол бодит байдалтай нийцэхгүй байгааг харуулж байна хэмээн Европын комиссар Стефан Фул мэдэгджээ. Тэрээр өнгөрсөн долоо хоногт Европын холбооны хэлэлцээрийн асуудлаар Украйны ерөнхий сайдтай ярилцахыг хүссэн ч ямар ч хариу өгөөгүй гэж хэллээ. Өнгөрсөн сард болсон Европын холбооны хэлэлцээрийн үеэр Украйны эрх баригчид ОХУ-тай харилцаагаа гүнзгийрүүлэх сонирхолтой байсан нь дээрх ярилцлагад хэлсэн үгээр батлагдаж байна. Ерөнхий сайд мөн ОХУ-тай хамтрах нь Украйны байгалийн хийн тээврийг үр ашигтай болгох шийдэл гэж ярьжээ. Өмнө нь Азаров сайд Украйн улс Орос болон хуучин Зөвлөлтийн бүрэлдэхүүнд багтаж байсан орнуудтай хамтрахгүй гэж мэдэгдэж байсан ч тийм сонирхол байгааг харууллаа гэж эх сурвалжууд мэдээлж байна. Гэтэл Украйныг Европын холбооноос хөндийрөх гэж байгаа хэмээн шүүмжлэгчид Киев хотын тусгаар тогтнолын талбайд жагссаар байгаа билээ. Үүнээс гадна "Хэрвээ Европын холбоо 20 тэрбум еврогийн тусламжийг Украйнд өгөхөөр болвол нэгдэх асуудлыг нээлттэй үлдээнэ" гэж ерөнхий сайд хэлсэн байна. Харин Европын холбооноос албан ёсны хариу өгөөгүй ажээ.