Хятадын баруун хэсэгт орших Шинжиан мужид өнөөдөр 16 хүн тэсрэх төхөөрөмжид өртөж, нас баржээ. Үүний хоёр нь цагдаагийн ажилтан байсан бөгөөд эрх баригчид террорист халдлага гэж нэрлэсэн байна. Тус мужийн цагдаа нар халдлагыг үйлдсэн гэмт этгээдүүдийг эрэн сурвалжилж эхэллээ. Байгалийн баялаг ихтэй энэ мужид Уйгур, Турк хэлтэй лалын шашинтууд түлхүү оршин суудаг байна. Хан үндэстнүүд сүүлийн хэдэн арван жилийн турш Уйгурчуудтай таагүй харилцаатай байгаа юм. 2009 онд болсон мөргөлдөөний улмаас 200 гаруй хүн нас барж, 1700 хүн шархадсан билээ. Хятадын эрх баригчид Уйгурчуудын бухимдлыг төрүүлэхүйц хүч хэрэглэсэн алхмуудыг хийсээр байгаа ажээ. Гэхдээ өнөөдөр болсон цагдаа нар болон иргэдийн хоорондох мөргөлдөөнд аль үндэстэн оролцсон нь тодорхойгүй байна. Хятадын эрх баригчид өнгөрсөн аравдугаар сард Тяньминий талбайд болсон халдлагад Уйгурчуудыг буруутгаж байгаа юм. Шинжианд 8 сая Хан үндэстэн, 10 сая Уйгур хүн амьдардаг боловч Уйгурчуудын дунд ажилгүйдлийн түвшин өндөр. Тиймээс Уйгур үндэстнүүд ялгаварлах үзэл гаргаж байгаад гомдолтой явдаг байна.