Эмнести интернэйшнл байгууллагаас Төв Африкийн бүгд найрамдах улсад хоёр өдөр үргэлжилсэн харгислалын уршгаар 1000 орчим хүн амиа алдсан гэж мэдэгдлээ. Дээрх байгуулллагаас хүний эрхийг зөрчсөн харгис үйлдлээ зогсоохын сануулсан байна. Тус улсад хүчээ аваад буй Христийн бүлэглэл энгийн иргэдийг олноор нь цаазалж, зэрэмдэг болгох эсвэл шашны барилга байшингуудыг эвдэж, сүйтгэх зэргээр харгислалаа үргэлжлүүлж байгаа юм. Өнгөрсөн гуравдугаар сард лалын шашны Селекагийн цэргүүд болон босогчид Бангуй хотыг эзлэн авснаас хойш эмх замбараагүй байдал, хүчирхийлэл газар авчээ. Францын колонид байсан энэ улс алт, эрдэнэс, зааны соёогоор баялаг. Гэвч тусгаар тогтносон улс болсоноос хойш буюу сүүлийн 53 жилд энэ орон улс төр, эдийн засгийн хувьд тогтвортой байсан тохиолдол ховор ажээ.