Тайландын нийслэл Бангкок хотноо хэдэн арван мянган иргэд Засгийн Газрыг түлхэн унагахын төлөө дахин жагсаж эхэллээ. Жагсагчид ерөнхий сайд Инглак Шинаватрагийн гэр болон, хотын гол худалдааны төвүүд байрладаг газрууд, замын уулзваруудыг хаажээ. Тайландад үүссэн тогтворгүй байдлыг намжаахын тулд ерөнхий сайд Шинаватра  сонгуулийг товыг удахгүй зарлана гэж мэдэгдэж байсан юм. Гэсэн хэдий ч ирэх хоёрдугаар сарын 2-нд дахин сонгууль болохоор товлогдсон нь жагсагчдын дургүйцлийг төрүүлсэн байна. Гэхдээ жагсагчид дахин тэмцлээ үргэлжлүүлэх хамгийн гол шалтгаан нь сүүлийн мөргөлдөөний улмаас дөрвөн хүн амиа алдсантай холбоотой бололтой. Энэ сарын 9-нд парламентыг тараасныхаа дараа ерөнхий сайд иргэдийн эсрэг хүч хэрэглэхээс татгалзана гэж мэдэгдэж байв. Тайландын арми, улс төрийн намууд хоёр хуваагдаж, иргэдийн эсэргүүцэл тэмцэл ширүүч байгаа энэ үед иргэний дайн гарах вий хэмээн эмээж байна.