Ким Чен Ун авга эгчийнхээ нөхрийг цаазалсан нь бизнесийн маргаантай асуудлаас үүдэлтэй гэсэн саналыг Өмнөд Солонгосын тагнуулын албанаас гаргажээ. Жан Сон Тэкийг авилгал авсан гэж үзэж, цаазалсан талаар Хойд Солонгосын төв хэвлэлээр мэдэгдсэн юм. Энэ нь тэдний хоорондох эрх мэдлийн тэмцлээс үүдэлтэй гэж шинжээчдийн зарим нь таамаглаж байв. Харин Өмнөд Солонгосын тагнуулын албаны дарга Нам Жэ Жүн, "Жан, Ким нарын хооронд эрх мэдлийн тэмцэл байсныг үгүйсгэхгүй боловч Жан Сон Тэк улсынхаа нүүрсний болон худалдааны томоохон төслийн салбарт ажиллаж байхдаа эрх мэдлээ хэтрүүлэн ашигласан" гэж хэлжээ. Жан Сон Тэк энэ салбарын агентлаг, хууль батлагчдын хооронд зөрчил үүсгэж байсан гэнэ. Ким энэ маргааныг шийдвэрлэхийн тулд Жан Сон Тэкийг засгийн эрхнээс түлхсэн гэж тус албанаас дүгнэсэн байна. Ким Чен Уны хувьд энэ шийдвэр нь Жан Сон Тэкийн амь наснаас ч илүү үнэ цэнэтэй байсан бололтой. Жон Сон Тэк эрх мэдлээ бэхжүүлэхийн тулд эрх мэдэлтнүүдийн дунд цэвэрлэгээ хийж эхэлсэн тухай тагнуулчид мөн дурджээ. Гэхдээ Кимийн эрх мэдэл бат бөх хэвээрээ гэж үзжээ. Японы “Ёмури Шимбун” сонин авга ахаа цаазлах шийдвэр гаргахдаа Ким согтуу байсан гэж бичсэн бол “Нью-Йорк таймс” сонины сурвалжлагчид зэвсгийн маргаанаас үүдэлтэй гэж тайлбарлаж байсан юм.