Монгол Улс тусгаар тогтнолоо сэргээсний 102 жилийн ой өнөөдөр тохиож байна. Түүхт өдрийн хүрээнд Богд Жавзандамба хутагтын хөшөөг Тусгаар тогтнолын талбайд байршуулах шийдвэрийг Нийслэлийн ИТХ-ын тэргүүлэгчдийн хуралдаанаас гаргасантай холбоотойгоор шав тавих ёслол одоо болж байна. Мөн энэ өдрийн хүрээнд 13.20 цагт Төрийн ордны хойд цэцэрлэгт байрлах Монгол төрийн тамганы хөшөөнд төр засгийн удирдлага, нийслэлийн удирдлага, улстөрийн нам хүчнүүдийн төлөөлөл цэцэг өргөх юм.

Гурав дахь жилдээ уламжлал болгон тэмдэглэж байгаа Үндэсний эрх чөлөө, тусгаар тогтнолоо сэргээсний 102 жилийн ойн энэ өдөр мөн чансаа өндөр 128 бөх барилдана. Хүчит бөхийн барилдаан 14.30 цагт эхэлнэ.
Тэртээх 102 жилийн түүхийг эргэн сөхвөл, Монгол Улс хоёр зууныг дамжсан Манж чин улсын ноёрхлыг 1911 оны арванхоёрдугаар сарын 29-нд халжээ.  Эрх чөлөө, тусгаар тогтнолынхоо төлөөх энэхүү зоригт тэмцлийг бидний өвөг дээдэс эв санаагаа нэгтгэн хийж чадсанаар дэлхий дахинаа туурга тусгаар Монгол Улс болохоо баталгаажуулж зарласан түүхтэй.