ОХУ-ын өмнөд хэсэгт орших Волгоград хотын галт тэрэгний буудалд амиа золиослогч этгээд бөмбөг дэлбэлж, 16 хүн алагдсан байна. Мөн 40 гаруй хүн шархдаад байгаа бөгөөд 9 настай нэгэн охин ээжээ алджээ. Албан ёсны мэдээллээр гартаа үл мэдэгдэх зүйл зөөж явсан нэгэн эмэгтэй бөмбөг тавьсан гэнэ. Энэхүү халдлагын дараагаар ерөнхийлөгч Владимер Путин галт тэрэг, нисэх онгоцны хамгаалалтыг чангатгахыг санууллаа. Энэ хэргээс үүдээд Кремльд бөмбөг дэлбэлсэн этгээдэд өгөх шийтгэлийг хатуу болгохоор хуулийн төслийг боловсруулахаар ярилцаж байна. Энэ онд Оросын Хойд Кавказад амьдардаг лалын шашинтнууд хэд хэдэн удаа халдлага гаргаж байсан билээ. Дэлбэрэлт болсон Волгоград хот нь Москвагаас өмнө зүгт 900 км, Хойд Кавказаас 650 км, харин Сочи хотын өвлийн олимп болох газраас 700 километрийн зайтай юм. Өвлийн олимп болоход хэдхэн долоо хоног үлдсэн байхад ийм халдлага гарсан нь дэлхий нийтийн санааг зовоож эхэллээ.
