Өнгөрсөн онд дэлхий нийт Сирийн химийн зэвсгийг устгах ажлыг идэвхтэй зохион байгуулсан боловч хүүхдүүдийг хамгаалах хэрэгсэл болж чадсангүй. Хоёр жил гаруй үргэлжилсэн Башар Ассад болон босогчдын хоорондох дайны улмаас Сири хүүхдүүдийн хувь заяа бүрхэг болжээ. Өнгөрсөн хоёр долоо хоногийн турш Алеппо хотод үргэлжилсэн бөмбөг, дэлбэрэлтийн уршгаар 500 хүн амиа алдсаны 150 нь хүүхэд байгаа юм. 2014 онд Сирийн дүрвэгдсийн тоо нэмэгдэж, 4 саяд хүрэх бөгөөд тэдгээрийн 1,1 сая нь 18 нас хүрээгүй хүүхэд байна гэсэн судалгааг мэргэжилтнүүд гаргажээ. Сирийн дөрвөн хүүхэд тутмын нэг нь улс оронд үүссэн зөрчил, тэмцлийн улмаас эцэг, эх, гэр бүлээ алдсан гэсэн судалгаа бий. Үүнээс гадна зөвхөн Ливанд 200 гаруй мянган хүүхэд сургууль завсардсан ажээ. Сири хүүхдүүд дайны хөлд ийнхүү үрэгдэж байхад олон улсын байгууллагууд дорвитой алхам хийж чадахгүй байгааг хүний эрхийг хамгаалагчид шүүмжилж байна.
