Өчигдөр объектын гал түймрийн 4, зөрчлийн 3, аврах ажиллагааны 3, цогцос гаргах 1, мэдээллийн 2 дуудлагаар нийслэлийн Аврах анги, харъяа дүүргийн Онцгой байдлын хэлтсийн Аврах, гал унтраах ангийн бүрэлдэхүүнийг гаргаж шуурхай арга хэмжээ авч ажилласан. Тухайлбал,  Баянзүрх дүүргийн 27 дугаар хороо, Сэлбийн 17 дугаар гудамжинд гэр шатаж байна гэсэн дуудлагын дагуу Аврах, гал унтраах 34 дүгээр ангийн тасгийг гаргахад 4 ханатай гэрийн дотор талд эд хогшил шатаж байсныг унтрааж 1 сая төгрөгийн өмч хөрөнгө аварсан байна. Уг галд гэрийн эзэн 51 настай эрэгтэй өртөж нас барсан байсныг дүүргийн Цагдаагийн 2 дугаар хэлтсийн жижүүрийн бүрэлдэхүүнд хүлээлгэн өгчээ. Мөн Баянзүрх дүүргийн 28 дугаар хороо, Хужирбулангийн 11 дүгээр гудамжинд байшингийн дээвэр шатаж байна гэсэн дуудлагын дагуу Аврах, гал унтраах 35 дугаар ангийн тасгийг гаргахад 7х8 метрийн хэмжээтэй мансардтай байшингийн дээврийн хэсэг яндангийн цонолтоос шатаж байсныг унтраажээ.