АНУ-ын шуурхай албанд ажилласан байсан 100 орчим албан хаагчийг хоморголон баривчиллаа. Тодруулбал, 72 цагдаагийн ажилтан, найман гал сөнөөгч, таван зөвлөхийг баривчилсан гэж прокурорууд мэдэгдсэн байна. Тэдгээрийн дийлэнх нь 2001 оны есдүгээр сарын 11-ний халдлагын үеэр ажил үүргээ гүйцэтгэж яваад хөгжлийн бэрхшээлтэй боллоо гэсэн хуурамч мэдэгдэл гаргасан байжээ. Мөрдөн байцаагчдын хэлж буйгаар тэдгээр албан хаагчид халдлагаар далимдуулан улсаас тэтгэмж авч, ажилгүй суусан гэнэ. Албан хаагчдын дийлэнх нь халдлагын үеэр цочролд орж, сэтгэцийн өвчтэй болсон гэж мэдүүлсэн байжээ. Тэдгээр хүмүүсийн хохирлын нөхөн төлбөр болгож дээд тал нь 500 мянган долларыг олгосон юм. Энэхүү залилангийн хэргээс Америкийн засаг захиргаа хэдэн зуун сая долларын хохирол амссан болохыг хууль хяналтын байгууллагынхан тогтоожээ. Өнгөрсөн 20 гаруй жилийн хугацаанд ажлын чадвараа алдсан хэмээн худал мэдүүлсэн 32 хүнийг баривчилж, зохих шийтгэл оноосон байна. Тэдгээр хүмүүс теннис тоглож, дугуйн уралдаанд оролцож яваад баригдсан гэнэ.