Өнгөрсөн мягмар гаригт “Тэнгис” кино театрын баруун талд “Макс өргөө” компанийн барьж байсан барилгаас төмөр унаж, 35 настай залуугийн амь нас хохирсон талаар бид өмнө нь мэдээлсэн. Хэргийг одоо Чингэлтэй дүүргийн цагдаагийн хэлтэст шалгаж байгаа юм. Тэгвэл тус хэрэгтэй холбогдуулан Чингэлтэй дүүргийн цагдаагийн хэлтсээс “Мээж гласс” ХХК-ийн гүйцэтгэх захирал Ш.Нямдаваа, тус компанийн хөдөлмөр хамгаалал, аюулгүй ажиллагааны инженер Л.Амгалан нарыг Эрүүгийн хуулийн 183.1-т заасан үндэслэлээр сэжигтнээр татаж, баривчилжээ.

“Макс өргөө” компанийн гүйцэтгэх захирал Д.Энхзаяа нь барилгын гадна талын шилэн фасадын ажлыг гүйцэтгүүлэхээр “Мээж гласс” ХХК-ийн захирал Ш.Нямдаваа болон “Fassad in” компанийн захирал Ким Хэ Жун нартай 2013 оны долдугаар сарын 5-нд гэрээ байгуулж, “Макс өргөө”-гийн ерөнхий захирал Д.Ганбаатараар батлуулжээ. Гэтэл үүнээс өмнө МХЕГ-аас тус компанийн барилгад шалгалт явуулж, 2013 оны долдугаар сарын 1-нд барилгын ажлыг түр зогсоох шийдвэр гаргасан байжээ. Харин хоёр долоо хоногийн дараа Чингэлтэй дүүргийн нэр бүхий хоёр байцаагч уг барилгыг ажиллуулах зөвшөөрлийг олгосноор барилгын ажил үргэлжлэн явагдаж байсан нь энэ юм байна.