Хятадын Хюнан мужийн оршин суугч Кюн Гон хэмээх 25 настай бүсгүйг хоёр дахь хүүхдээ төрүүлэх гэж байхад нь хүчээр үр хөндүүлсэн байна. Энэ хэрэг хоёр жилийн өмнө болсон бөгөөд түүнд маш хүчтэй тариа хийсний улмаас шезофринтэй болсон гэнэ. Бүсгүйг долоон сартай жирэмсэн байхад нь ийнхүү хууль бусаар үр хөндүүлсэн юм. Иймэрхүү байдлаар бие сэтгэлээрээ хохирсон эмэгтэйчүүд олон бий. Тэдгээр эмэгтэйчүүд эрх мэдэлтнүүдээс нөхөн олговор авахаар тэмцэж байна. Өнгөрсөн оны 11-р сард Хятад улс нэг хүүхэдтэй байх хатуу хуулийг цуцалсан ч олон хүүхэдтэй болох хүсэлтэй гэр бүлд саад тотгор их бий. Учир нь шинэ бодлогод эцэг, эх нь мөн айлын ганц хүүхэдтэй байвал хоёр хүүхэдтэй болохыг зөвшөөрнө гэжээ. Мөн хүүхдүүд заавал нэг эцгийнх байх ёстой ажээ. Тиймээс шинэ бодлого иж бүрэн шинэчлэгдээгүй гэж үзэж болох юм. Хэрэв засгийн шаардлагыг биелүүлж чадахгүй бол Гон бүсгүйн адил эрсдэлд орох магадлал өндөртэй. Хятадын эрх баригчид хориглож, шийтгэхийг мэддэг ч иргэдийн эрх ашгийг хамгаалах талаар хангалттай алхам хийдэггүй хэмээн хүний эрхийг хамгаалагчид буруутгаж байгаа юм.