Дэлхийн хоёрдугаар дайны үед секс боолчлолын зорилгоор эмэгтэйчүүдийг хүчирхийлдэг байсныг гэрчлэх нууц баримт олдлоо. Энэ талаар Хятадын Синьхуа агентлаг онцолсон байна. Япончуудтай холбоотой 32 баримтад цэргүүдийн дур хүслийг хангахын тулд эмэгтэйчүүдийг хүчээр бэлгийн харилцаанд оруулах, хулгайлж наймаалах зэрэг гэмт хэрэг үйлдэж байсан тухай өгүүлжээ. Хэргийг үйлдэхдээ цэргийн хүч ашиглаж байсан хэмээн буруутгаж байна. 1945 оны гуравдугаар сарын 27-ноос дөрөвдүгээр сарын 19-нийг хүртэлх бичиг баримтад цэргүүдэд эмэгтэйчүүдийг илгээх зорилгоор мөнгө шилжүүлсэн тухай дурджээ. Мөн мөнгө шилжүүлсэн тухай утасны яриа олдсон байна. Япончууд Хятадын Нанжин муж дахь долоон газар уг хууль бус үйл ажиллагааг явуулж байсан гэнэ. Нанжинд нэг эмэгтэй 10 өдрийн дотор 71-267 цэрэгт үйлчилж байжээ. Япон цэргүүд Хятад эмэгтэйчүүдийг хэрцгийгээр тамлан зовоож байсан тухай баримтууд ч олдоод байгаа юм. Тухайлбал, Японы сар тутмын сонинд нэгэн япон цэрэг согтуу байхдаа Хятад эмэгтэйг хэрцгийгээр хүчиндсэн талаар нийтэлж байсан нь архивт хадгалагдаж үлджээ. 1945 оны наймдугаар сард Япончууд бичиг баримтуудыг устгасан боловч 1950 онд Хятадын Жилин мужийн үйлдвэрээс зарим баримтууд олдож байв. Өнгөрсөн оноос Жилин мужийн архивын газраас эдгээр баримтуудыг нягталж, орчуулж эхэлсэнээр Хятад эмэгтэйчүүдийн эрхийг зөрчиж байсан дээрх хэрэг илэрлээ. Түүхчдийн тооцоолсоноор дэлхийн хоёрдугаар дайны үед Япончууд секс боолчлолын зорилгоор 200 мянган эмэгтэйг хүчирхийлж байсан гэж үздэг.