Америкийн сэтгүүлч, зохиолч Дэвид Саттер ОХУ-аас хөөгджээ. Гардиан сонинд энэ талаар хүйтэн дайнаас хойш Америк сэтгүүлч Оросоос хөөгдсөн анхны тохиолдол боллоо хэмээн онцолжээ. Өмнө нь Дэвид Саттер Их Британид төвтэй Financial Times сонины Москва дахь тусгай сурвалжлагчаар ажиллаж байжээ. Дэвид ЗХУ болон ОХУ-ын талаар гурван цуврал ном бичиж, өнгөрсөн оны есдүгээр сараас Америкийн радиод зөвлөхөөр ажиллаж байв. Өнгөрсөн 12-р сард Оросын Волгоград хотын халдлагын үеэр 30 гаруй хүн амиа алдахад тэрээр хэргийн газар дээр ажиллаж, сурвалжлага бэлтгэжээ. Ингээд “CNN” агентлагийн вэб сайтад “Оросын хар тэнгисийн эрэг дээрх өвлийн олимпийг үзэж сонирхох жуулчид дайны бүс рүү явж байна” гэж Дэвид бичжээ. Энэ нь түүний хөөгдөх шалтгаан болсон бололтой. Дэвидийн визаг сунгах хүсэлтийг хүлээж аваагүй тул Украйныг зорьсон байна. Харин одоо цаашид хаана ажиллахаа шийдэхийн тулд Лондонд амьдарч байна гэж тэрээр Твиттер хуудсаар дамжуулан мэдэгдлээ.