Манай улсын 25 настай иргэн Б.Энхтуяа Малайз улсад өнгөрсөн арваннэгдүгээр сард харамсалтайгаар амиа алдсан хэрэг гарсан.  Улмаар талийгаачийн гэр бүлийнхэн болон Гадаад харилцааны яам, Консулын газар хамтарсан баг тус улсыг зориод ирсэн. Харин тэднийг Малайз руу яваад ирснээс нь хойш уг хэрэг нам жим болоод байгаа.  Учир нь  уг хэрэгт сэжигтэнээр тооцогдох хүмүүс байхгүй болсон гэдгийг Малайзын тал хэлсэн байна. Тиймээс хэргийг хааж магадгүй байдалтай байгаа гэдгийг зарим эх сурвалж мэдээллээд байгаа юм.

Урьдчилсан байдлаар  талийгаач Э-г амиа хорлосон байж болзошгүй гэж Малайзын цагдаагийн  байгууллага үзэж байгаа юм. Гэвч талийгаачийг "гадны нөлөөгөөр амиа алдсан уу, амиа хорлосон уу гэдгийг сайн нягталж өгнө үү" гэсэн манай талын хүсэлтийг Малайзын тал хүлээн авч хэргийг дахин нарийвчлан шалгаж эхэлсэн юм. Улмаар  энэ сарын сүүлээр Малайзын цагдаагийн байгууллагаас хариу албан бичиг манайд ирүүлэх   юм байна. Мөн талийгаачийн гэр бүлийн зүгээс  Хууль зүйн сайд Х.Тэмүүжинд хандаж хэргийг үнэн мөнөөр шийдэж өгөхийг хүссэн захидал илгээхээр болоод байгаа.

Тэгвэл энэ хэрэг манай улсад ийн нам жим болж байхад гадныхан хэргийн талаар цуурч эхэллээ. Учир нь Малайзын хэвлэл мэдээллийн хэрэгслээр монгол охины тухай мэдээ материал гарч эхэлсэн юм.  Гагцхүү гадныхан Малайзад амиа алдсан Б.Энхтуяагийн үхэлтэй холбоотой нийтлэлүүдийг бэлгийн дарамтаас болж, биеэ үнэлж байгаад гэх мэтээр бичиж эхэлсэн нь харамсалтай.

Тэдний нийтлэлд дурдагдсанаар охиныг бэлгийн дарамтанд орж, буруу хүмүүстэй нөхөрлөж байгаад эцэст нь өөрийгөө егүүтгэсэн гэх мэтээр бичжээ. Мөн охины хэргийн талаар хуулийнхнаас яриа авч дэлгэсэн нь хүмүүсийн анхаарлыг ихэд татаад байгаа аж.

Юутай ч гадны хэвлэлүүдэд гарч байгаа мэдээллээр ч гэсэн тухайн хэргийг хаах төлөвтэй байгааг дурдсан байна.  Учир нь хуулийн байгууллагынхан нь өөрсдөө тэгж мэдэгджээ.

Тэгэхээр энэ сарын сүүлээр манай улсад Малайзын цагдаагийн байгууллага тухайн хэргийн талаар албан бичиг ирүүлэх учиртай. Харамсалтай нь энэхүү албан бичигт хэргийг хаах тухай дурдсан байх болов уу гэсэн таамаг иргэдийн дунд бий болоод байна.