Иргэний нисэхийн ерөнхий газар сүүлийн нэг жилийн хугацаанд 70 ажилтнаа халсан гэх мэдээллийн эргэн тойронд бид дараах сурвалжлагыг хийлээ.

Ажлаас халагдсан иргэдтэй уулзаж санал бодлыг нь сонсоход  "Иргэний нисэхийн ерөнхий газар Монгол Улсын хууль тогтоомжийг зөрчих болсон. Мөн Монгол Улсын Үндсэн хуулиар олгогдсон хүний эрхэнд халдах нь хэвийн үзэгдэл болж байна. Бүтцийн өөрчлөлт нэрийдлээр олон жил ажилласан туршлагатай боловсон хүчнүүдээ ажлаас нь халж, оронд нь туршлагагүй, мэдлэг чадвар муутай, өөрсдийн ойр дотны хүмүүсийг ажилд авч байгаа нь Иргэний нисэхийн ерөнхий газар доголдоход хүргэлээ" гэцгээж байв.

Улмаар ажлаас халагдсан нэгэн эмэгтэйдээ уулзаж ярилцлахад,   “Би инженерийн ажилтай байсан. Гэтэл сүүлдээ бүр намайг машин угаагч хий гэж хэлсэн. Үүнийг би доромжлол гэж үзэж байгаа. Миний оронд авсан хүн бол Ц.Даваасүрэн гишүүний хүн гэж яригдаж байгаа. Үнэн худлыг нь би сайн мэдэхгүй байна. Ерөнхийдөө өөрийнхөө талын, ах дүү, танил тал, найз нөхдөө ИНЕГ-т дүүргээд байна” хэмээсэн юм.

ИНЕГ-аас халагдсан иргэд хуулийн байгууллагуудад хандсан гэдгээ мэдэгдлээ. Улмаар тэд  гурван шатны шүүхийн шийдвэрлэлт хүртэл ажилчдын талд гараад байхад удирдлагууд нь энэ шийдвэрийг үл тоож биелүүлэхгүй байгааг онцолсон юм. Тэр дундаа тус газрын үйлчилгээний албаны дарга  Н.Батхуяг гэж хүн ажилтнуудын санал гомдлыг сонсохгүй байгаа аж.

Түүнчлэн, халагдсан ажилчдаас ШШГЕГ-аар албадан асуудлаа шийдүүлж буцаад ажилдаа орсон хүмүүс ч байгаа аж. Гэвч тун удалгүй дахиад халчихдаг гэж ярьж байсан юм.


Тэгвэл Иргэний нисэхийн ерөнхий газар бүтцийн өөрчлөлт хийж байгаагаа Зам тээврийн яаманд заавал мэдэгдэх ёстой байдаг ч дотооддоо шийдвэрлэдэг болох нь батлагдсан юм.

Тиймээс Зам тээврийн сайд А.Гансүх ажлын хэсэг байгуулж, ямар шалтгаанаар ажилчдаа олноор нь халах болсоныг судлахыг үүрэгдсэн байна.

Тиймээс манай сурвалжлах баг уг ажлын хэсгээс зарим зүйлийг тодруулах гэсэн боловч "Байгуулагдаад нэг хонож байгаа бөгөөд дөнгөж материалтайгаа танилцаж байгаа учраас мэдээлэл өгөх боломжгүй" гэв.

Бид дараагийн удаа Замын-Үүд дэх гаалийн ажилчдын халаа сэлгээний талаар мэдээлэх болно.

Төрийн байгууллагынхны хууль бус халаа сэлгээ, ажлын  байрнаасаа шалтгаангүйгээр хөөгдөх зэрэг асуудлаар цуврал материал хүргэх болно.