2014 он гарсаар 8 хүний нас барж 176 хүн хүнд хөнгөн гэмтсэн байна.  Он гараад 15-хан хонож байхад зам тээврийн ослоор найман хүн амиа алдаж, 176 хүн гэмтсэн гэдэг маш "хүнд" тоо юм. Чухам ямар учраас зам тээврийн осол ихээр гарч байгаа талаар ЗЦГ-ын Урьдчилан сэргийлэх хэлтсийн байцаагч, цагдаагийн хошууч С.Бямбасүрэнгээс тодрууллаа.

-Он гараад яг хэчнээн осол хэргийн дуудлага хүлээн авсан бэ?

-Энэ оны эхний 14 хоногийн байдлаар Замын цагдаагийн газрын шуурхай удирдлагын төвд нийт 3594 зам тээврийн осол хэргийн дуудлага хүлээн авсан. Замын хөдөлгөөний аюулгүй байдлын эсрэг гэмт хэргийн шинжтэй 132 дуудлага мэдээлэл ирсэн. Үүнээс 176 хүн гэмтсэн байгаа. Нас баралтын хувьд найм байна.

-Улаанбаатарт хэчнээн хүн нас барсан бэ?

-Улаанбаатарт гурав, хөдөө, орон нутагт таван хүн нас барсан. Тиймээс иргэддээ хөдөлгөөнд оролцохдоо дүрмийнхээ дагуу оролцохыг анхааруулж байна.

-Согтууруулах ундаа хэрэглэж хөдөлгөөнд оролцсон тохиолдол хэчнээн байна?

-Нийт 976 жолооч согтуугаар тээврийн хэрэгсэл жолоодсон байгаа. Үүнээс 32 жолооч согтуугаар тээврийн хэрэгсэл жолоодож яваад осолд холбогдсон байгаа.  Мөн согтууруулах ундаа хэрэглэсэн үедээ замын хөдөлгөөнд явганаар оролцсон зорчигч 14 байна. Тиймээс баяр наадам, сар шинэ ойртож байгаатай холбогдуулан иргэд архи, согтууруулах ундааны зүйл хэрэглэсэн үедээ замын хөдөлгөөнд оролцохгүй байхыг анхааруулья. Мөн айраг уучихаад би цагаан идээ хэрэглэсэн гэдэг нь буруу юм. Айраг бол согтууруулах ундааны зүйлд ордог гэдгийг онцолмоор байна.