“Гал үндэстэн” холбооны хэд хэдэн гишүүнд холбогдох хэргийг шүүх хурал Цагдан хорих 461 дүгээр ангид хоёр өдрийн турш болж өнгөрлөө.

Тэднийг Төрийн хамгаалалттай хэд хэдэн газарт тэсрэх бөмбөг байрлуулсан, төрийн албан хаагчийн өөдөөс галт зэвсэг ашигласан, иргэдийг заналхийлсэн гэх хэргээр шүүсэн юм. Тэгвэл өчигдөр 23.00 цагийн үед шүүгчид шийдвэрээ гаргаж тэдэнд 21 жил, зургаан сарын хорих ял оноожээ. Тодруулбал,
Ц.Мөнхбаяр, Г.Болдбаатар, Д.Төмөрбаатар, Ж.Ганболд нарт 21.6 жилийн хорих ял, М.Мөнхболдод хоёр жилийн хорих ял тус тус оноосон байна. Харин О.Самбууёндон, Б.Гантулга нарыг гэм буруугүйд тооцож, цагаатгасан байна.

Шүүх хурлын шийдвэрийн сонссон шүүгдэгчдийн ар гэрийнхэн ухаан алдаж, шүүх танхимд эсэргүүцлээ илэрхийлж нэлээн юм болсон талаар эх сурвалж хэлж байна.

Юутай ч ялын хэмжээг ар гэрийнхэн нь болоод холбооныхон нь хүлээн зөвшөөрөхгүй байгаа юм. Тиймээс өнөөдөр тэдний зүгээс хэвлэлийн хурал хийж, эсэргүүцэж байгаагаа мэдэгдэхээр болжээ. Өөрөөр хэлбэл, дүүргийн эрүүгийн хэргийн анхан шатны шүүхийн шийдвэрийг хүлээн зөвшөөрөхгүй байгаа тул давж заалдах шатны шүүхэд хандахаар төлөвлөж байгаа аж.

Г.Уянга гишүүний хувьд ч гэсэн эцсээ хүртэл тэдний талд зогсохоо амлаж, шүүх хурлын шийдвэртэй санал нийлэхгүй байна гэжээ.

Түүнчлэн зарим иргэд  ч энэхүү шийдвэрийг эсэргүүцэж жагсаал цуглаан зохион байгуулж магадгүй байдалд хүрээд байна.

Нийслэлийн прокурорын газраас Ц.Мөнхбаяр нарт Эрүүгийн хуулийн 177.2 буюу зандалчлах, эрх бүхий байгууллага, албан тушаалтнаас тодорхой шийдвэр гаргуулах буюу гаргахаас татгалзуулахад шууд буюу шууд бус нөлөөлөх зорилгоор олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хэрэглэхээр заналхийлсэн, 149.3 бусдын эд хөрөнгийг бүлэглэн авахаар далайлган сүрдүүлсэн, 185.2 буюу галт зэвсэг, байлдааны галт хэрэгсэл, тэсэрч дэлбэрэх бодис хууль бусаар хийж бэлтгэсэн, хадгалсан гэх үндэслэлүүдээр яллах дүгнэлт үйлдсэн байна.

Мөн мөрдөн байцаалтын явцад Ц.Мөнхбаяр нар ТББ-ын нэрээр бусдаас 67 сая төгрөг авсан нь тогтоогдсон юм.