Оросын гадаад хэргийн сайд Сергей Лавров Украины тэмцэгчид хяналтаас гарч байгааг анхааруулаа. Тэрээр Засгийн газрын эсрэг тэмцэгчид болон цагдаа нарын хоорондох мөргөлдөөн, хүчирхийллийг “аймшиг” гэж тодорхойлсон байна. Киев хотын гудамжинд уурлаж хилэгнэсэн залуус парламентын ордны гадна хамгаалалтанд зогсож байгаа цагдаагийн ажилтнууд руу тэсрэх бөмбөг шиджээ. Харин үүний хариуд цагдаа нар жагсагчдыг зодож, мөргөлдөөн шөнөжингөө үргэлжилсэн байна. Энэ үеэр 80 гаруй цагдаа шархадсан юм. Мөн 32 жагсагч хоригдож байгаагийн 13 нь олон нийтийг өдөөн турхирсан хэргээр 15 жилийн ял сонсчээ. Украины жагсагчид өнгөрсөн оны 11-р сараас хойш Европын холбоонд Украиныг нэгтгэхээс татгалзсан удирдагчдыг эсэргүүцэж байгаа юм. Өнгөрсөн долоо хоногт Украины парламент жагсаал, цуглааны эсрэг хууль баталсан нь хүчирхийлэл газар авахад нөлөөлжээ. Харин Украины ерөнхийлөгч Виктор Янукович жагсаал, цуглаан улс орны тогтвортой байдалд нөлөөлж буйг хүлээн зөвшөөрч байна гэж мэдэгдлээ. Тэрээр мөн Европын холбооны төлөөлөгчид урилгагүйгээр Украинд айлчилж, жагсагчдыг өдөөн турхирсан гэж хэлжээ. Гэхдээ төлөөлөгчдийн нэрийг хэлэхээс татгалзсан байна.