Ерөнхий сайд Н.Алтанхуяг олон түмнийг басан доромжилсон агуулгатай үгийг хээвнэг хэлдэгээрээ урьд өмнөх ямар ч Засгийн газрын үед хийгдээгүй “Шинэчлэл”-ийг эхлүүлээд байгаа. Намын даргынхаа эхлүүлсэн шинэчлэлийг гишүүд нь ч идэвхтэй дэмжиж эхэлжээ. Том төрөөс ухаалаг төррүү шилжих хамгийн эхний алхам болох  УИХ, Засгийн газрын эрх мэдэл, хариуцлагын зааг ялгааг тодорхой болгох “Давхар дээл”-ийг тайлах Ерөнхийлөгчийн санаачилсан хуулийн төслийг тэд унагаад зогсохгүй дэмий улс төржилт хэмээн үзэж байгаагаа нуугаагүй. Хэрвээ УИХ-ын гишүүн, сайд байхыг хориглох бол үүнийг 2016 оноос хэрэгжүүлье гэж хэлж байна. Тэдний хэлж буйгаар тэнэгтсэн чигээрээ 2016 он хүртэл яваад, тэрнээс цаашаа ухаалаг болох ёстой аж. Мөн түүнчлэн АН-ын бүлгийн дарга Д.Эрдэнэбат “унтаа намуудыг татан буулгана”... “сэрсэн үү та нар, сэрсэн бол баярлалаа би тоглосон юм” гэж улс төрийн намуудаар тохуурхасан бол сайд С.Эрдэнэ “Төрөх эмнэлэгтэй болтол төрөхөө больчих” гэх зэргээр “Шинэчлэл”-ийн бухиаг үргэлжлүүлсээр байна. Үнэхээр бодлогын түвшинд ийм шинэчлэлийг ярилцаж тохиролцсон юм шиг үйл явдал ар араасаа цуварч эхэллээ. Тухайлбал Ерөнхий сайд Н.Алтанхуягын хэвлэлд өгсөн томоохон ярилцлага олны анхаарлыг татаад зогсохгүй зарим хүмүүсийн эгдүүцлийг төрүүлж байна.

Улаанбаатар утаагүй болох уу? гэсэн сэтгүүлчийн асуултанд “Утаагүй болно” гэж яг таг хариулжээ. Ингэхдээ “төлөвлөгөө гараагүй, ерөнхий дүр зургаа гаргаад явж байна” гэжээ. Өөрөөр хэлбэл төлөвлөгөөгөө гаргаагүй байж ерөнхий дүр зургаараа 3 жилийн дотор Улаанбаатарын утааг арилгах юм байх. ТЭЦ-5-ын ажил ямар шатанд явж байгааг асуутал “Ээ дээ тун бүтэл муутай байна” гэж хээвнэг хариулжээ. С.Батболдын Засгийн газар 2015 онд ТЭЦ-5-ын эхний ээлжийг ашиглалтанд хүлээх авахаар ажиллаж байсныг зогсоогоод дахин өөр байршилд цахилгаан станцыг байгуулах болсноор энэ ажил үндсэндээ зэгтэрийн гацаанд орсон билээ. Түүнчлэн улс орны эдийн засгийг хүнд байдалд оруулаад байгаа сайд Н.Батбаяр, Ч.Улаан нарыг “хамгийн сайн ажиллаж байгаа” гэж тодорхойлсон нь олон хүний эгдүүцлийг хүргэж байна. Үнэ тогтворжуулах нэрээр 3 их наяд төгрөг зарцуулсан бөгөөд үүний үр дүнд 14%-тай байсан үнийн өсөлтийг 10.5% болгосон энэ бол том амжилт гэж дүгнэжээ. Урьдын түүхэнд аль ч Засгийн газар улсынхаа төсвийн талтай тэнцэх мөнгөөр хөтөлбөр хэрэгжүүлж, үнийн өсөлтөөс 3.5% чангааснаа том амжилт гэж тодорхойлж байсангүй. Энэ мэтээр Ерөнхий сайдын байр сууринаас өөрийгөө дөвийлгөж хаацайлсан, өрөөлийг басаж доромжилсон өнгө аяс их ажиглагдана. Өндөг бол тансаг хэрэглээ гэж хэлснийгээ “Өндөгийг тансаг хэрэглээ гэж хэлээгүй юм, үнэтэй болсон гэхээр нь идэхээ байчих гэсэн юм” гэж залруулжээ.

Ийнхүү Шинэчлэлийн Засгийн газрын Ерөнхий сайд нь ард иргэдээ хоол хүнсгүй бол идэхээ байхыг, Хүн амын хөгжлийн сайд нь эмнэлэг байхгүй бол төрөхөө байхыг сануулж эхлээд байна. Цаашдаа ард иргэдийнхээ өмнө тулгамдаж байгаа асуудлыг больчих, байчих гэсэн зарчмаар шийднэ гэвэл Шинэчлэлийн Засгийн газрын уриа “БОЛЬЧИХ” болж таарч байна. Энэ маягаар цаашлаад зам түгжрэлтэй бол гарахаа байчих, утаа ихтэй бол амьсгалахаа больчих, цалин бага бол ажиллахаа больчих, эмнэлэг хүрэлцээгүй бол өвдөхөө больчих гэсэн зарчмаар асуудлыг шийдэж хэрвээ таалагдахгүй бол Монголд амьдрахаа болихыг зөвлөх бололтой.