НҮБ-ын тусгай элч Лахдар Брахим Сирийн энхийн хэлэлцээрийн хоёрдугаар шат амжилт муутай эхэлсэн талаар мэдэгджээ. Дайсагнагч талууд өөрсдийнхөө шаардлагыг тавьж, зөвшилцөлд хүрч чадахгүй байгаа нь хэлэлцээрийг төвөгтэй болгож байна. Сирийн Засгийн газрын төлөөлөгчид хүчирхийлэл, терроризмыг зогсоохыг харин босогчдын төлөөлөгчид шилжилтийн Засгийн газрыг байгуулахыг шаардаж байгаа ажээ. Ингэснээр талуудын сонирхол иргэний дайныг зогсоох гол зорилготой нийцэхгүй байгаа талаар ноён Брахим мэдээллээ. Зөрчлийг шийдвэрлэхийн тулд талуудын тавьж байгаа шаардлагуудыг аль аль талаас нь авч хэлэлцэж, хэлэлцээрийг үргэлжлүүлэх юм байна. Гэхдээ хоёр тал өөр өөрсдийнхөө зарчмыг баримталж, нэг нэгнийгээ буруутгасан хэвээр байгаа ажээ. Хэлэлцээрийн эхний шатанд бүслэлтэнд байгаа Хомс хотын иргэдийг нүүлгэн шилжүүлэхээр тохиролцож, энэ ажлыг хэрэгжүүлж эхэлсэн. Одоогоор 1000 гаруй иргэнийг Хомс хотоос гаргажээ.
