Сочигийн өвлийн олимп хөшгөө хаалаа. Орчин цагийн олимпийн түүхэнд байгаагүй их зардал гаргаж, сүр дуулиантай эхэлсэн энэ олимпийн хаалт ч мөн амжилттай өндөрлөв. Олимпийн түүхэнд хамгийн их хэл ам дагуулсан өвлийн 22-р наадам барууныхны амлаж байсан шиг муу зүйлээр төгссөнгүй. “Дэлхийн шилдэг тамирчдыг нэгэн дээвэр дор цуглуулсан энэхүү их наадам энх тайван, тэсвэр хатуужил, хүндэтгэлийн үнэ цэнийг үзэгчдэд мэдрүүлж чадлаа” хэмээн олон улсын олимпийн хорооны дарга Томас Бах онцолжээ. Хаалтын арга хэмжээ инээд хөөрөөр дүүрэн болж өнгөрсөн байна. Энэ үеэр эрэгтэйчүүдийн цанын 50 километрийн төрөлд шидгээр шалгарсан гурван тамирчинд медалийг нь гардуулсан юм. Мөн 62 төгөлдөр хуурч Оросын сонгодог хөгжмийн аяыг нэгэн зэрэг тоглож, баллет, яруу найргийн шилдэг бүтээлийг үзэгчдэд сонордуулжээ. Сансарт аялаад ирсэн олимпийн түүхт бамбарыг дөрвөн жилийн дараа өвлийн олимпийг зохион байгуулах Өмнөд Солонгост хүлээлгэн өгчээ. 16 өдрийн турш үргэлжилсэн өвлийн олимпийн наадмаар 98 багц медальтан шалгарч, зохион байгуулагч ОХУ нийт 33 медаль авсанаас 13 нь алт байж багийн дүнгээр тэргүүллээ.