Египетийн ерөнхийлөгч асан Мохамед Мурси улсын нууц задруулсан гэдгийг тус улсын прокурорууд мэдэгджээ. Энэ хэрэгт Мурсигаас гадна Лалын ахан дүүс байгууллагын 35 хүн холбогдсон байна. Тэднийг Палестины Хамас бүлэглэл болон Иран зэрэг гадаадын эрх мэдэлтнүүдтэй хуйвалдаж, үндэсний аюулгүй байдалтай холбоотой нууцыг задруулсан хэмээн буруутгажээ. Мурсигийн хамсаатнууд 2005 оноос 2013 оны наймдугаар сар хүртэл улс оронд эмх замбараагүй байдал бий болгож, террорист халдлага үйлдэх зорилгоор тагнуул хийж байсан болохыг прокурорууд мэдэгдсэн байна. Хэрэв шүүхээс буруутай гэдгийг нь тогтоовол цаазаар авах ялаар шийтгэх ажээ. Түүнийг мөн 2011 оны бослогыг хүчээр дарж, олон хүний аминд хүрсэн хэмээн буруутган хорьж байгаа билээ. Египетийн Засгийн газар Лалын ахан дүүс болон түүний хамсаатнуудыг эсэргүүцсээр ирсэн юм. Өнгөрсөн оны долдугаар сард Мурсийг засгийн эрхнээс түлхэн унагасны дараа түүнийг дэмжигчид эсэргүүцэл өрнүүлэн тэмцэж 800 гаруй хүн амиа алдсан юм.