Туркийн сөрөг хүчнийхэн ерөнхий сайд Эрдоганыг хүүтэйгээ хамсан их хэмжээний мөнгө завшсан хэрэгт буруутгаж, огцрохыг шаардаж байна. Тэд ерөнхий сайд, хүү Билалтайгаа улсын мөнгийг хэрхэн нууж, хувьдаа завшиж байгаа талаарх дэлгэрэнгүй яриаг хуулбарлан авч олон нийтэд цацжээ. Мөн энэхүү харилцан ярианд парламентын гишүүд ч мөн хэрхэн авилгал авч байсан талаар дэлгэрэнгүй өгүүлсэн байна. Харин Рижэп Тайип Эрдоган энэхүү бичлэгийг худал хуурмаг зүйл хэмээн хүлээн зөвшөөрөхгүй байгаа ажээ. Тэрээр ёс суртахуунгүй мэдээлэл цацахаасаа өмнө нягтлах хэрэгтэй гэж үзэж байгаа бөгөөд шалгуулахад бэлэн гэдгээ мэдэгджээ. Гэсэн ч Туркийн сөрөг хүчнийхэнд итгэсэн олон зуун хүн Эрдоганыг “хулгайч” хэмээн дуудаж, огцрохыг шаардан жагсчээ. Истанбулын цагдаагийн газраас жагсагчдыг нулимс асгаруулагч, усан буу ашиглан тараасан байна. Туркийн Засгийн эрхийг 11 жил барьж буй Ерөнхий сайд Режеп Тайип Эрдоганыг огцруулахын төлөөх жагсаал одоогоос хэдхэн сарын өмнө гарч эхэлсэн билээ. Тухайн үед Эрдоганыг огцруулахын төлөөх эсэргүүцлийн жагсаал, бослого Туркийн 80 гаруй мужийг хамарч, олон мянган хүн нэгдээд байсан юм. Мөн Туркт хоёр хоногийн өмнө интернэтийн эрх чөлөөг хязгаарласан хуулийг эсэргүүцсэн тэмцэгчид цагдаа нартай мөргөлдсөн билээ.