Украины ерөнхийлөгч Виктор Янукович Казакстан эсвэл Крым дэхь цэргийн баазад нуугдаж байгаа гэсэн мэдээлэл цацагдаад байсан юм. Харин Оросын хэвлэлүүдэд Януковичийг өчигдөр шөнө Москвад хүрэлцэн ирж, нийслэл хотоос холгүй орших тансаг амралтын жуулчлалын баазад амьдарч буй талаар мэдээлжээ. Энэ талаар нэрээ нууцлахыг хүссэн Оросын нэртэй бизнесмэн ярьсан байна. Тэрээр Януковичийг тансаг зочид буудалд амраад өнөө өглөө амралт, сувиллын баазад очсон гэжээ. Киев хотын эрх баригчид Януковичийг Украиндаа байгаа гэж мэдэгдсэн ч энэ мэдээлэл худал бололтой. Украины прокурорууд Януковичийг интерполоор эрэн сурвалжлуулах саналтай байгаагаа эрх баригчдад дуулгажээ. Украинд ерөнхийлөгчийн жилийн цалин 100 мянган доллар байдаг бөгөөд Янукович үүнээс хэд дахин их мөнгөтэй байсныг мөрдөгчид нотолсон билээ.