Украины ерөнхийлөгч Виктор Януковичийг засгийн эрхнээс түлхэн унагасны дараа Крымийн хойгт Баруунхныг дэмжигчид болон Украины үндсэрхэг үзэлтнүүдийн хооронд мөргөлдөөн гарсан билээ. Зэвсэгт этгээдүүд Крымийн төрийн ордонг эзэлж “Крым бол Оросынх” хэмээн хашгирч байв. Хар тэнгисийн эрэг дээрх Украины энэхүү хойгт 1,3 сая хүн оршин сууж байгаагийн дийлэнх нь Орос үндэстнүүд ажээ. Тодруулбал, оршин суугчдын 24 хувь нь Украин, 58 хувь нь Орос, 12 хувь Татарчууд юм байна. Татарчууд 1991 онд Зөвлөлтийн систем нуран унасны дараа Оросууд энэ газарт давуу эрхтэй байгааг эсэргүүцэж, байнга тэмцэл өрнүүлж иржээ. 2010 оны ерөнхийлөгчийн сонгуулиар Виктор Януковичийн хамгийн их дэмжлэг авсан энэ бүс нутагт Крымийг Украины парламентаас хараат бус болгож, салан тусгаарлуулахын төлөө тэмцэл өрнөж байна. Сүүлийн 200 гаруй жил Оросын ноёрхолд байсан Крымыг Москвагийн эрх баригчид 1954 онд буюу Зөвлөлт засаглалын үед Украинд шилжүүлэн өгсөн түүхтэй. Энэ шийдвэрийг Крымийн Орос үндэстнүүд түүхэн алдаа гэж үздэг байна. Одоо Украины хууль ёсны эзэмшилд байдаг Крым нь парламентаа бие даан сонгодог автономит муж гэж үздэг. Крым түүхэндээ олон удаа тулаан өрнүүлж, олон улсын эзэмшилд орсон байдаг. Тухайлбал, 1853-1856 онд Крымийн дайны дараа Их Британи, Францчууд нөлөөгөө тогтоож байсан ажээ.