Агаарын тээврийн үйлчилгээ эрхлэгч “Qantas” компанийн гүйцэтгэх захирал Алан Жойс ирэх гурван жилийн дотор 5,000 ажлын байраа танах гэж байгаагаа мэдэгджээ. Тус компани 50 гаруй онгоц худалдан авах захиалгаас татгалзаж 2017 он гэхэд 2 тэрбум австрали доллар хэмнэхээр төлөвлөсөн байна. Энэ онд гэхэд онцын шаардлагагүй 1,500 ажлын байрыг танаж, санхүүгийн хямралаас гарна гэж тооцож байгаа юм. 2011 оноос “Virgin Australia” компанийн нислэг ихэссэнээр өрсөлдөгчдөө ялагдаж байгаа хэмээн Алан Жойс хэлжээ. Мөн түлшний үнэ өсч, эдийн засаг тогтворгүй байгаа нь голлон нөлөөлсөн гэж үзэж байна. “Qantas” компани зургаан сарын дотор 252 сая австрали долларын алдагдалтай ажиллажээ. Тус компанийн 33 мянган ажилтны 93 хувь нь Австралийн иргэд ажээ.