Украины оргон зугтсан ерөнхийлөгч Виктор Янукович Крымийн иргэдийг хамгаалах зорилгоор цэрэг илгээхийг Оросын талаас хүссэн хэмээн НҮБ-ын Москва дахь элч Виталий Чуркин мэдэгджээ. Виталий Чуркин НҮБ-ын аюулгүйн зөвлөлийн хуралдаан дээр ноён Янукович өнгөрсөн Бямба гаригт ОХУ-ын ерөнхийлөгч Владимер Путинд захидал ирүүлсэн гэжээ. Тэрээр энэ захидлын хуулбарыг төлөөлөгчдөд үзүүлэхэд бэлэн гэж хэлсэн байна. Гэвч НҮБ-ын төлөөлөгчид Виктор Януковичийн захиалгаар цэрэг оруулж хүч түрэх нь буруу учраас энэ үйлдлээ нэн даруй зогсоохыг шаарджээ. Виктор Янукович нь Украин дахь Оросын иргэдээс ихэхээн дэмжлэг хүлээдэг байсан юм. Тиймээс ч түүнийг огцорсны дараа Украины Орос иргэд түлхүү амьдардаг мужуудад эмх замбараагүй байдал үүссэн. Крымээс гадна Орос иргэд түлхүү амьдардаг Украины зүүн мужуудад ерөнхийлөгч Виктор Януковичийг засгийн эрхнээс түлхэн унагаснаас хойш тогтворгүй байдал үргэлжилж байгаа юм. Өчигдөр мөн Донецк, Одесса хотуудад Оросын талыг дэмжигчид бослого хөдөлгөөн өрнүүлж, төр захиргааны төв байрыг эзлэхийг завджээ. Энэ хооронд Оросын цэргүүд болон Москваг дэмжигч цагдаагийн бие бүрэлдэхүүн Крым дэхь Украины цэргийн баазыг бүслэн авсан талаар эх сурвалжууд мэдээллээ. НҮБ-ын Украины төлөөлөгч Юрий Сергеев Крымийн хойгт Оросын 16 мянган цэрэг байршуулсан гэж мэдэгдсэн юм. Харин Оросын төлөөлөгч цэргийн хүч ашиглаж байгаа гэсэн мэдээллийг үгүйсгэжээ. ОХУ-ын дэмжлэг авсан Крымийн тэмцэгчид газар нутгийг эзлэн авахаар зүтгэж магадгүй учраас айдас түгшүүр арилаагүй байгаа ажээ.