Салбарын сайдтайгаа ойлголцохгүй болсон, шүлхийтэй малын махыг ард түмэнд хэрэглэж болно гэж зөвлөсөн зэрэг хэл амнаас салахаа байсан үйлдвэр хөдөө аж ахуйн яамны төрийн нарийн бичгийн дарга Х.Золжаргалыг ажлаас нь чөлөөлөхөөр яригдаж байна. Түүнийг ажлаас чөлөөлөх хэд хэдэн үндэслэл бий болсны хамгийн ноцтой нь шүлхийн вакциныг хөлдөөсөн явдал юм.

Өдрөөс өдөрт хил хүрээгээ тэлсээр байгаа шүлхий өвчний эсрэг манай эрх баригчид хэрэлдэхээс өөр зүйл хийж чадахгүй байгаа. Онцгойн асуудал хариуцсан шадар сайд маань энд тэнд тууз хайчилсан шигээ хээвнэг явж байх хооронд байдал улам хүндэрсээр байна. Хугацаа нь дууссан, найдваргүй вакцин малд тарьснаас болж шүлхийн дэгдэлт гаарсан гэдгийг зарим хүмүүс онцлоод байгаа. Өнгөрөгч долоо хоногт эмийн бүртгэлд бүртгэгдээгүй вакцин оруулж ирэхээр болж байна гэсэн мэдээлэл багагүй шуугиан тариад байсан бол вакцин тойрсон өөр нэгэн асуудал маш хурцаар тавигдах боллоо.

Тодруулбал ҮХААЯ-ныхан 1.6 тун вакцин хөлдөөсөн асуудал ил болж салбарынханы дажинг улам дэвэргэж байна. Шүлхийн вакциныг оруулж ирсэн “СВС” компани дээрхи вакциныг галт тэргээр оруулж ирснээс болж 2.5 тэрбум төгрөгийн хохирол улсад учирсан гэж эх сурвалж мэдээллэж байна. Яаралтай оруулж ирэх ёстой эдгээр вакциныг зориулалтын чингэлэгт эсвэл агаарын тээврээр авчрах ёстой байсан ч холбогдох хүмүүс ашгаа бодоод ном гормийнх нь дагуу оруулж ирээгүйгээс ийм нөхцөл байдал үүсээд байгаа ажээ.  Вакцин тойрсон бүтэлгүйтэл, хэрүүл маргаан тасрахгүй байгаа нь түүний цаана эргэлдэх хэдэн тэрбумаар яригддаг мөнгөний ашиг сонирхолтой холбоотой. Хугацаа нь дууссан вакцинаас эхлээд хөлдүү вакцин оруулж ирэх хүртэл салбарынханы хариуцлаггүй байдал эрх мэдэлтнүүд шүлхийг дарах бус дэвэргэх сонирхол байна уу? гэсэн хардалтруу өөрийн эрхгүй хөтлөх болж байгаа юм.

Тэгвэл улсад их хэмжээний хохирол учирсан дээрхи явдлыг нууж гарах аргагүй болсон ҮХААЯ-ныхан хөлдүү вакцины хариуцлагыг төрийн нарийн бичгийн дарга Х.Золжаргалд үүрүүлэхээр болсныг эх сурвалж онцолж байна. Хуулийн дагуу төсөв хөрөнгөө захиран зарцуулах эрх бүхий албан тушаалтан нь төрийн нарийн бичгийн дарга байдаг. Тэгвэл "СВС" компанийг сонгож гэрээ байгуулсан Х.Золжаргалыг ажлаас нь чөлөөлөхөөр эрх баригчид тохиролцсон байна. Энэ санаачлагыг салбарын сайд Х.Баттулга дэмжих болсон аж.  Учир нь ҮХААЯ-ны сайд Х.Баттулга, Х.Золжаргал нар хоорондоо таарахаа байгаад удаж байгаа. Тэдний талцлаас болж яамныхан хоёр хуваагдаж ажил нь ч тодорхой хэмжээгээр унах болсныг эх сурвалжууд мэдээллэдэг. Тэгвэл сайд, төрийн нарийн бичгийн дарга нарын зөрчилд энэ үйл явдал цэг тавих болсон байна. Түүнчлэн шүлхийтэй махыг эдийн засгийн эргэлтэнд оруулах тухай Х.Золжаргал хэвлэлд ярилцлага өгч эрх баригчдын нэр хүндийг багагүй унагасан нь түүнийг ийнхүү ажлаас нь чөлөөлөхөд нөлөөлсөн гэдгийг ч эх сурвалж онцолж байна.