АНУ-ын эмнэлгүүдэд бусад улс орнуудаас гурав дахин их антибиотик хэрэглэдэг гэдийг хорт хавдраас урьдчилан сэргийлэх, хянах төвөөс мэдээлэв. Ингэснээр өвчтнүүд антибиотик хэтрүүлэн хэрэглэж, халдварыг эсэргүүцэх чадвараа алдаж байгаа юм. Эмийн жорыг эмнэлгүүдэд харилцан адилгүй тунгаар бичиж өгдөг хэдий ч ирээдүйд халдварыг эсэргүүцэх чадвар буурах, харшил өгөх, гэдэсний халдвар үүсгэж үхэлд хүргэх зэрэг эрсдэлийг нь тооцохгүй байгаа хэмээн тус байгууллагаас шүүмжилжээ. АНУ-ын 323 эмнэлэгт явуулсан судалгаагаар хэвтэн эмчлүүлж буй өвчтөнүүдийн талаас илүү хувь нь антибиотик хэрэглэж байгааг тогтоосон аж. Уушиг, давсагны халдвартай өвчтөнүүд зонхилох хувийг эзэлж байсан бөгөөд өвчлөлийн шалтгааны 14-17 хувийг нян эсэргүүцэх чадваргүй болсонтой холбон тайлбарладаг. Антибиотик халдварыг устгах сайн талтай боловч АНУ-д жилд 250 мянган хүнийг дахин халдварлуулж, 14 мянган хүнийг үхэлд хүргэхэд нөлөөлж байгаа гэсэн судалгаа гаргажээ. Ер нь аливаа эмийг тохирох тунгаар хэрэглэж байхыг мэргэжилтнүүд сануулж байна.